Kembang Rampe Kasusastraan Bali Purwa Wewidangan I Buku II/Geguritan Kedis

by I Gusti Ngurah Bagus miwah I Ketut Ginarsa

[ 23 ]

1.8 GEGURITAN KEDIS

Puh Sinom

1. Suba ka sisi I Cangak, kedeke rame makilit, iyong uyut matrayuhan, Tetengkek ngekek ngedekin, I Cangak delak-delik, sebuh buka pusuh tembus, I Cangak sayan jengah, sebenge ambul kiladin, nimbal nabuh, gandrunge magegandrungan.
2. Curig gangsa kamarenteng, gender lenyeh mangrerengih, barangin pamunyin rebab, sumangkinya mangiyun-yunin, wetu idris dadi, papancane salah dundun, baan tabuhane melah, kocapan I Gandrung kalih, sampun bangun, manyolahin gegambelan.
3. Igele asri angraras, rarase mangebut bangkit, nyabcab ngilehan kalangan, mairib rejang dedari, kepetnyane mapusing, menepek marengin kempul, kedis singutngute kena, nging mula pacang mangibing, payas-payas, panganggone sarwa gadang.
4. Ngeberang saput matandang, limane tinggarang ngitir, baane mabungkung canggang, masih anggon ngaliabin, gandrunge manyandarin, yang lanang sarwi angrungu, sokasi bebandaran, renyah munyinnyane jangih, mapanyambung, ṗanak biyut nem diwang.
5. Budi kasih ababaran, anak liu edalemin, dulurinya baan liat, pangibinge alah girik, culuke buka mati, gegretenan dasdas nyaup, kapobaan di kalangan, gandrunge manepek malih, bareng kumpul, ngenaang I Kedis Pekat.
6. Nging masih mula gumana, krana panganggone putih, alihang apanga tinggar, sinah baanya mabalih, udeng putih maselim, mapilpil ngebit di pungkur, petung tinggi adannya, teturahan cara Bali, pantes paut, kambulan sebenge wayah.
7. Jongkoke maparerasam, gandrunge sampun nyandarin, tetabuhan parianom, gupekin kendang madandit, pekate manyagjagin, ngigel mangarepin gandrung, [ 24 ]
   1. enggak-enggok ngelengang, tabuh petuke tindakin, kitak-kituk, ngalelier manggutan.

8. Ulat rengu mamentosang, gandrunge kejat-kejitin, bikase tama maekang, oncer gandrunge usudin, diman laut, silapin, kedeke laut mabriuk, gandrunge sampun medal, ngalengser ngalih pangibing, maseliuk, lilite katepek kene.
9. Ento mangedanin payas, panganggo sarwa burintik, abete ngutangin raras, tah keto sebenge blengih, suba bangun mangibing, paling igelnyane inguh, asing laku, maliat, beriag liu ngedekin, sebeng bancut, menyerutcut ngasisiang.
10. Tonden tutug akempulan, awanan kasasandarin, kakurungan batan jaka, kudu galak makelegin, surak sumangkin titir, Sugeme nyeser ka malu, napak negak di tengah, bau ia katepek kibing, manggarupuk, kedeke cara prabangsa.
11. Bangun nabdab saput gadang, nyarebet ngarebo lambih, makamben dadu lamlaman, gandrunge suba ngigelin, ngolet buka ngeresin, tindak panglambete alus, dempo-dempo mararas, Sugeme suba nimpalin, pada lemuh, angsel tanjek mauluhan.
12. Liu pada mangucapang, tong madaya bengkang-bengking, basange gede mambodag, igele kaliwat lewih, ada laut nyautin, ia mula ngebo tan mundur, aketo kakranaan, ada ke pada mabalih, suba ngucur, gandrunge manepek Cangak.
13. Tonden bangun makolongan, uyut kedekne mabalih, ada palih pasah, kalutuk milu ngarikgik, kedek manguyak tai, tuting kendang onya craput, dasdasan pacang ora, kaleyange manggerengin, sangkan payu, buin laut manabuhang.
14. Gegandrunge pacarcina, ejor manglaut kagunting, ne mabalih manebengang, majeljel dempet masepid, ditu I Cangak raris, bangun nging saking ngalalu, saget surak maseyok, I Cangak nyosnyos malaib, batis tigul, pungkur I Saline negak.