Kembang Rampe Kasusastraan Bali Purwa Wewidangan I Buku II/Geguritan Kasmaran

by I Gusti Ngurah Bagus miwah I Ketut Ginarsa

[ 69 ]

1.22 GEGURITAN KASMARAN

Puh Kumambang

1. "Tampi Ratu atur titiange puniki, satmakaang titiang mawak nongos di pangadi, parek Ratu di pamreman.
2. Ngasih-asih kedeh manunas swecanin, bas tong nyandang pisan, sapuniki sai sedih, setata mangrumrum gawang.
3. Sat bramara tan pegat wantah mandimdim, wekas ngameledang, madun bungane ne miik, nongos jeroning gedong meka.
4. Sok mabaan pameled-meled ngiwasin, bin pidan kasidan, Ratu bas rangkunan celih, pepilu tong bakat tengab.
5. Kudiang titiang keneh titiange ne mangkin, kanggo kenya ida, ne makrana sapuniki, lali tan meling ring awak.
6. Bas kalebih gemes idane nyakitin, pisan ja matiang, apang tuara ada sida, ngijeng manunas sayangang.
7. Durung pisan titiang taen mamanggihin, anak buka ida, srenggara jaen tur mungil, anut sing separi polah.
8. Tatuian Ratu paragaan sasih, purnamaning kapat, pamulune lumlum gading, di mirib emase ngudaang.
9. Napi wada ring karep alus manis, kenjing aji bara, balabur santerup sai, membah ring lambene mecat.
10. Seksek indang ge1ikang Ratu saliksik, rasa tong mabaan, inab kaayone kadi, Ratih mapupulan melah.
11. Twara titiang Ratu sakeng ng amanisin, jati tatuian, yan sida acepe panggih, Ratu ngaraga ngodagang.
12. Dah nempilang titiang twara palih-palih, puput antuk ida, kodagang panjakang sai, sakayun ida mratingkah.
13. Nging pinunas titiange Ratu abesik, pagehang tegtegang, dah embahang june gunjih, nglalu manglampusang raga.
14. Sinja-sinja gitgit ben bakat ceburin, gigis ke rasanya, sakite pacang tepukin, saurin manandang jengah. [ 70 ]
    15. Atu mas sayange twara nandingin, puput tan pedapa, sat mawak winten loji, mula tong bakat kenehang.
    16. Nyandang anggon bebanggan tangkilin sai, lingling di pamreman, turuang baan pangawi, lenyeh bantas sukat karna.
    17. Kenken tonya legane sida mapanggih, sat suba di suargan, sakeneh sida madaging, suka tan pabalik duka.
    18. Angob pisan titiang sakadi ne mangkin, yan apa makrana, kenehe tong dadi balik, tekek krajut baan tresna.
    19. Teka manapuh ulangun samati-mati, sai mamulisah, ne demenin twara gati, amatra magatra sweca.
    20. Painganan kudiang pacang mangelidin, manitah betara, pakrengin suba titi, mangacep sakeng kadohan.
    21. Mastenya twara ada ican Widi, manuduhang ida, kayune maawak meling, olas manganggo parekan.
    22. Palilaang edah ida ngamenggahin, ban titiange kapah, katepuk twara sai, rauh manangkilin ida.
    23. Yadin keto satmakaang bareng sai, dini mamarekan, pitresna titiange tampi, manggeh twara bisa obah.

Puh Sinom

1. Tan masa to titiang Dewa, Ratune pacang ngranehin, kapuputannyane rusak, pangidep titiange paling, nyusup tekan I Manik, sayan sue sayan inguh, leleh ko titiang paling, manaang kenehe sakit, pineh paleh, rusak tong dadi tuptupang.
2. Tuptupang Ratu onyangang, kayune teken i sedih, dening kadung ida olas, nganggo titiang panjak silib, eda buin i manik, maalihan dini-ditu, yadin ko Ratu titiang. madohan teken i manik, dah jua engsap, mungguh titiang ngistiang.
3. Ngistiang buin awekasan, apang twara buka jani, setata masasawatan, katepuk krana sakit, atmane twara mulih, nu kocap dini mangikut, bungeng kenehe baya, idupe samalan mati, depang apang, pisan-pisan mati bangka.