Kembang Rampe Kasusastraan Bali Purwa Wewidangan I Buku II/Geguritan Goak Ngematiang Lelipi Gede

by I Gusti Ngurah Bagus miwah I Ketut Ginarsa

[ 8 ]

1.4 GEGURITAN GOAK NGAMATIANG LELIPI GEDE

Puh Dandang Gendis

1. Ada goak dadua lua muani, ne magenah, di Kepuh Kasiapa, ne liwat-liwat tegehe, gedenne klangkung-langkung, di bongkolne liwat pingit, dening ada gooknya, kagenahin antuk, ula lintang kabinawa, caling bilang, I Goak ma nak cerik, kabaksa baan I Wiala.
2. Kaduhkitan I Goak lua muani, mamangenang, panaknyane telah, mati kamah ban ulane, tumuli I Goak mabur, jumujug jeroning wanadri, ngulati sawitrannya, I Cemara gunung, nuturang kalacurannya, sarwi pojar", Kenken baan tiang jani, nyabran duhkita manah.
3. Hilang tiang ngelah pianak cerik, telah kamah, baan I Sarpa Raja, nongos di gook kepuhe, tongos tiange masebun, tulung kuda tiang ne jani, edengin pawilangan, pang sida ban lampus totonan I Wiala Raja," pasaurnya, I Asu Alasan aris, "Padalem ja tiang I Goak.
4. Tiang adi sato kaliwat cerik, tuara nyandang, lakar macundangang, sajawining upayane, anggon merangin i musuh", I Gagak aris mamunyi, "Ne ada indrajala, kalannya aturu, lakar cototin matannya, apang sida, parisantana ne kawingking, nemu rahayu makejang.
5. I Cemara nungkasin I Paksi, upayannya, jati ngawag-awag, tumuli kene munyinne, "Ene ada daya alus, yening nyak lakar nyalinin, tiang jani ngedengang, pang I Ula lampus, tur rahayu mapianak, suka rena, tusing nandang sakit hati, nongosin di Kepuh Kasiapa."
6. Tur nuncap I Gagak ngasih-asih, "Nunas ica, tulung Sang Cemara, manuduk lacur i jele, eda ima Beli manulung, tiang liwating sakit ati, tusing tiang mangengsapang, tekening pitulung, katresnane tekening tiang, kenyang kawekas, uli jani sampe mati, tuara tiang mangengsapang."
7. Saur bamban I Cemara mangkin, "Aduh Gagak, kema Adi luas, makeber ngojok tamane, droe Anake Agung, ditu ada bale pepekik, yening Cai ngajinang, busanan Sang Prabu,

[ 9 ]

1. di jeron pepelike totonan, yening sida, baan Cai ngeberang gelis, lautang ja ento aba.

8. Nanging apang pakeber caine gelis, apang kanten, antuk pangetutnya, tur ulungang di gookne, tongosne I Ula Agung, sinah pacang katut buri, keto pesan tuutang, apang sida lampus, musuh caine I Ula, saking daya, pangindrajalane sandi, ento anggon ngamatiang."
9. Katuutang ban I Gagak sami, nuli, mesat, manambung ka taman, mangojog bale pepelike, kajinang busana halus, druen putran Sang Bupati, tumumpangeng patrane, tumuli cinuduk, raris age kakeberang, Ida Sang Nata, kagiat wau mangksi, I Goak nyotot busana.
10. Busana Ida Sri Bupati, ento emas, masesocan mirah, inten mutiara breliane, parekne encol mangetut, I Gagak makeber aris, kacerita suba napak, di muncuk kepuh agung, tongosnya I Ula raja, ditu lantas, busanane prajani, kaulungang di gooknya.
11. Wau kanten pangetutnyane sami, kaulungang, busanan Sang Nata, ka tengah gook kayune, irika pada ia umung munyin anake nyagjagin, sami pada ngorahang, busanane engsut, tumuli ada ngenggalang, menek wreksa, kakantenang ula mandi, ditu laut kamatiang.
12. Samatinnya punang Wiala sandi, nuli enggal pangetutne nyemak, busanane sarwa mule, druen putran Ida Sang Prabu, laut katurang ke puri, Sang Nata lintang kenak, I Gagak puniku, rena idepnya magenah, karahayuan, di punyan kepuhe niki, dening i satru sirna.