Kembang Rampe Kasusastraan Bali Purwa Wewidangan I Buku II/Geguritan Kancil teken Gulungan Tikeh

by I Gusti Ngurah Bagus miwah I Ketut Ginarsa

[ 6 ]

1.3 GEGURITAN KANCIL TEKEN GULUNGAN TIKEH

Puh Ginada

1. I Kancil jani tuturang, ngajinang soroh prani, Gulungan Tikeh adanya, I Kancil mangomong sumbung, "Ih Gulungan Tikeh iba, dingeh beli, palaib ibane becat.
   
2. Yadin cai mlaib gangsar, sing icang kalahang cai, yening ngadu kabecatan, "Gulungan Tikeh mangrungus, dingeh Kancil manguman, manangtangin, tumuli alon saurnya.
   
3. Kenken munyine i busan, yadin plaib icang rindit sing ja icang lakar kasor, cai kancil liwat sumbung, nanging tongose karwanang, nene jani, "Sumaur I Kancil banggras.
   
4. Tui batis icange patpat, batis caine aketi, sinah cai lakar kaon, jalan suba jani maju, matanding lakar malomba, icang milih, pacang genahe malomba.
   
5. Ada gunung tegeh pasan, uli ditu mengawitin, kanti napak di sukunya, I Gulungan Tikeh manut, kedek - kedek lintang rena, tan gumingsir, tekening pasubayannya.
   
6. Mara I Kancil nginkinang, lakar ngenggalang nalaib I Gulungan Tikeh bunger, awakne bungker ngaluluk, ngalilik kaliwat becat, kadi mimis, santer palaibne gangsar.
   
7. I kancil angob ngatonang, I Gulungan Tikeh malaib, suba joh sawat batenan, malaib I Kancil nutug, kenehne bakal maliwat, kadi angin macedut palaibnya.
   
8. Apitnnyane tan kasidan, I Kancil laut ngalilik, awaknyane telah babak, tendase belah makaplug, polo lan getihnya muncrat, laut mati, baan sumbungne kaliwat.
   
9. I Gulungan Tikeh menang, napak di sukuning bukit, ane kanggon pawanengan, ban I Kancil liwat sumbung, napak-nyane karahayuan, ento jani, awake gedenan tendas.
   
10. Eda bes sumbung mapeta, yadian ia anak cerik, goba nista buin belog, tatasang mangdennya tau, apang eda salah parna, bengil cuil, da mangaden anak nista. [ 7 ]
    11. Ada Gagak aeng tindak, mangapak-apak mamunyi, sasabukannya mataros, polahe kadi praratu, rasa twara kueng apa, to tetesin, konang apanga pedas.
    12. Singnya ia mawanysa Menak, wireh titah cara jani, mangaku awake suka, sugih ditu bagus ditu, twara nyak ngandapang iba, ngaku ririh, sugih ngelah arta brana.
    13. Ento ane telektekang, takonang samping-sampingin,singnya ia tan paenggon, lacurnyane tan pacungkub, nyilih teken gelah anak, mamalingin, menelepin gelah pisaga.
    14. Ne ada marupa tiwas, kagkag-kigkig pesu mulih, ngasorang dewekne belog, manyalanang keneh batut, da nyugar mesuang peta, mangungkulin, mangaku awake pradnyan.
    15. Tusing adoh papindannya, tan bina i Punyan padi, ne maisi manguyukang, ciri suba liwating weruh, tau teken katuturan, ne sujati, catur jalmane kincepang.
    16. I Padi puyung tuturang, manyeleg manyucuk langit, munyinne sada ngarocck, buka yehe atengah jun, mangoncang merberang awak, mapi ririh, nanging elud tong tawanga.
    17. Eda ngadu kabecakan, bogbog sai demen puji, palemetin ban mangraos, tusing lemete enggal lung, tuah kekehe lakar alah, palapanin, sai manabuhang basa.
    18. Yan mangomong sumbar-sumbar, mangaku awake ririh, tuara nyak ngalap kasor, pedas liu ngelah musuh, bibihe ngemasin dosa, anggon pelih, sing suud lakar pipita.
    19. Jadin cerik buin nista, tan bawangsa bengil-cuil, da malu nyugar mangomong, sujati brahmana agung,mépangkat manitah jagat, sing nyirigin, bani mengetohang jiwa.
    20. Peteng Jemah ento incepang, tutur bapane pilikin, cai nyai miwah Embok, apang eda salah unduk, suba liu pratiwimbannya, yening pelih, sai dadi sasuryakan.