Kembang Rampe Kasusastraan Bali Purwa Wewidangan I Buku II/Geguritan Pan Pucung teken I Lutung

Saking Wikisource
[ 10 ]

1.5 GEGURITAN PAN PUCUNG TEKEN I LUTUNG

Puh Pucung

  1. Ada tutur, Lutung mamaling katimun, di tegal pabianan, di samping alase asri, teges ipun, alase ane jambat.
  2. Ada kubu, edoh pagenahanipun, manggihin pabianan, madaging katimun sami, sampun abuk, sedeng pisan sampun kalap.
  3. Kitak-kituk, I Lutung ngalap katimun, kasepah kaamah, wireh temba manepukin, kengin ipun, nyabran mamaling irika.
  4. Bu I Lutung, milihin sakenehipun, rena nyepah-nyepah, katimun sedek manadi, sadian ipun, I Lutung ngulurin kita.
  5. Woh katimun, wantah akidik kapungut, tur kasepah-sepah, kakemkem yehnyané sami, durung tutug, telah sami kasambatang.
  6. Sisanipun, sane kakutang madugdug, boya eman-eman, mungpung akeh ne kapanggih, woh katimun, kewala tuyuh mangamah.
  7. Nenten nandur, kalih tuara ia mabulung, woh katimun samah, I Lutung tau ngalapin, tusing tuyuh, jawaning ngrusak pagehan.
  8. Sane nandur, Bapa Pucung wau rauh, ngungsi pabiannyane, katimun lesag kapanggih, bingah-binguh, tegale mileh katatas.
  9. Woh katimun, mabrarakan pageluluk, tur masepah-sepah, di tengah kalih di sisi, tan paunduk, tingkahnyane sang mangalap.
  10. Iba Lutung, anti malu keneh aku, tusing ja buungan, iba Lutung lakar mati, Bapa Pucung, nuli budal gegancangan.
  11. Kaget rauh, kagelurin pianakeh luh, sane sampun daa, kakenken ngambil engket gelis, engket timbul, magantung duur jelanan.
[ 11 ]
  1. Suba puput, katurang ring Bapa Pucung, manggawe pepindan, kadi manusiane muani, kanggon petakut, di pabiane linggah.
  2. Kocap sampun, kakaput ban engket timbul, laut kajujukang, sig pabianannyane gelis, tuah atut, gobane kadi manusa.
  3. Sampun puput, raris budal Bapa Pucung, saking pabianannya, Pan Pucung ninggalin wau, I Lutung ne kacarita
  4. Dauh pitu, I Lutung age lumaku, saking gunung alas, milehan mangalih margi, ngangin-ngauh, ring abian katimun ika.
  5. Kagiat ipun, mangatonang i petakut, sinengguh manusa, saking doh ipun ngantenin, samar saru, mirib saja mirib boya.
  6. Mandeg mangu, pajalannyane I Lutung, sabilang atindak i petakut to kalingling, limanipun, tan mari ia ulap-ulap.
  7. Kedat-kedut, I Lutung mrarian dangu, mangeneh-ngenehang, yening saja janma mati, sinah ipun, magingsir saking irika.
  8. To petakut, wireh tusing ngelah bayu, majujuk manyengkang, nuli ada angin nyirsir, taying-tayung, liman petakut punika.
  9. Metu bingung, I Lutung takut kalangkung, sue ipun ngantosang, lingak-linguk tan mamargi, angin nyursur, ngampehang gandaning sekar.
  10. Manahipun, kadi kawewehin banyu, uriping bawana, I Lutung lega di ati, tan pagantul, manahnyane kakingkingan.
  11. Ben kasursur, antuk ambun sekar gadung, kadi manggih ratna, saukir kencana manik, anggut-anggut, I Lutung gelis manyagjag.
  12. Ya manuju, papindane mengket timbul, ne kadi manusa, sawusnya tampek kalingling, saja lamun, petakut tidong manusa.
[ 12 ]
  1. Wus I Lutung, lonto manusa majujuk, majejehin anak, tur matakut-takut sai, salah sengguh, kakaden saja manusa.
  2. I petakut, uli joh makada takut, majujuk manyengkang, jengkang-jengking majejehin, iba lutung, jani pang taanang iba.
  3. Egar langkung, I Lutung nyagur petakut, kajagur basangnya, limane kadi talinin, nuli muus, liman kaine kalesang.
  4. Ih petakut, basang ibane macucul, wanen ngisi lima, nyen buin kajagur kai, basang kembung, lakar anggon kakendangan.
  5. Limanipun, tan wenten dados kadutdut, sengitan manahnya, lima kebotne nyagurin, basang nyantung, sami keni engket limannya.
  6. Buka tegul, baan tali liwat kukuh, sing dadi kelesang, limannyane makakalih, bingah-binguh, I Lutung raris maninjak.
  7. Buntutipun, kakalih ninjakin ipun, keni engket samian, sengitan I Lutung ngerik, sayan kukuh, lima batis di banda.
  8. Kiad-kiud, kajengat-kajengit manyegut, mata kijap-kijap, manyegut bungutne keni, engket timbul, I Lutung sumingkin lumah.
  9. Daah-duuh, tulung-tulung gelur-gelur, manunas ring Sanghyang, sedih kingking sengi-sengi, Dewa Ratu, klesang jua mangkin titiang.
  10. Segu-segu, ngeling selegak-seleguk, yeh matannya mecat, tan papegatan mangeling, liwat ibuk, sesambate ngalad-alad.
  11. Inggih Ratu, nunas ica titiang tulung, titiang kasangsaran, sakit titiange tan sipi, kabelenggu, tan dados abet makiba.
  12. Mehmeh lampus, sisip titiang ngadug-adug, mangrusak pabianan, laksana titiang mamaling, kene tepuk, sakite anggon dadalan.
[ 13 ]
  1. Kaget rauh, ngaba tungked Bapa Pucung, I Lutung mangerak, jerat-jerit katigtigin, nunas ampun, nunas urip kapok pisan.
  2. Tur masaur, Pan Pucung munyine gangsul, "Taanang dosannya, salah ibane mamaling, ngawe letuh, mangrusak abian-abinanan."
  3. Lantas ditu, I Lutung kampegang laut, kataltal tendasne, tangan suku katalinin, kabelenggu, munyinne ngolasang manah.
  4. "Iba Lutung, lancang pongah iba ngaduk, malaksana corah, salah ibane gung sipi, ngadud-adug, bikas ibane durjana."
  5. Bapa Pucung, galakne nagih manusuk, manganggarang pedang, manuek mangunus keris, nyemak sadu, mamunggal mamukang-mukang.
  6. Age laut, I Lutung lantas kaimpus, patokang di natar, manuju suryane singit, kitak-kituk, ngajengit kedil kijapannya.
  7. "Keto Lutung, bikase awara rahayu, ala kapangguha, cucu buyut temokang mani, benjang esuk, tan dadi jelema muah.
  8. Yening ayu, satingkah ibane lantur, sing ada ngucapang, mangomong iba weci, tuara purun, agung alit muangsa menak."