BARONGSOMI
Wara-wiri
mailehan tan papegatan
maangkaban bulunnyane
punggalanne nraktak
nganti ia cara idup
sakewala
wit saking jadma
nyalukin di tengah
ngae ikut kenjir
kepes kejeng-kejeng
angkih-angkih
waluya cara buron
wantah kawisesan
I manusa niwakang
ngigelang barong
makran a idup
kipak-kipek
engap-engap
wantah paigelan
barong
yan ada jadma
gedenan tangkep
tan maisi babedag
kawastanin
angkaban
barong somi.
(Denpasar, 24-5-2002)
KUDIANGJANI
Aduh dewa ratu
panes bara rasane
inguh bayune
madukan
bacine kapolo
pangrasane nungkalik
panglokikane rarud
tatimbange slewah
beneh pelihe sarara
tegeh endepe katon patuh
munyi beneh
kadingeh pelih
pindur jati
kasengguhang pangopet
jaba-jerone madukan
sudra tri wangsane
tan ngelingin genah
lan swadharma
mapwara nista
nayaka praja
pangreh praja
tusing bisa
negakangjit
pada magarang
ngulati tongos
korsi sane tis
maprihe basbasan
swadharma tan kagambel
asing laksana
mangda mapikolih
awig-awig, wet
kapurug
ngarereh arta brana
madasar kanistan.
</blockquoter>
