MAYAHUTANG
Uling rare
nganti tua
saenune hidup
satonden uripe
matinggal
tan pegat
lakar nepukin
suka duka
sajroning hidup
apanga tiyaga
inget tur
pratyaksa ring
tatenger-cihna
panumadian
dadi jadma
ka mercapada
tuah tongos
mapakerti luwih
malajahang dewek
ngisinin ukudan
i kranjang padang
dasarin baan
papineh, pakrunan,
panglaksana
ayu nulus
apanga sida
pakertine luwih
anggon mayah
utang-utange
i maluan
manut bacakan
phala karma.
(Denpasar, 12-12-2001)
SASENGGAK GUMI
Yan ada jadma belog
pangat tur pengkung
tusing maidep malajah
kasengguh cara batu malablab.
Sajroning makruna mamunyi
tan papegatan tan sepi-sepi
tan matuktuk mabongkol
ento madan prakpak danyuh.
Munyine liu maduwegin
banban alon nyunyur manis
satata ngulati dadi pamenang
ento kaloktah cara Pan Bongkling.
Di pararem munyine tiyaga
pangrencanane gasep gupuh
yan malaksana ngramang-sawang
kaadanin Pan Balang Tamak.
Yan jadma luh utawi muani
pati grape limane magampil-gampil
tan ngitung gelah anak len
madan jadma malima ketket.
Sajroning mapepayasan
luh utawi muani asing kasaluk
udeng, pangus tur asin
ipun kaadanin mawak sangsangan.
(Denpasar, 13-12-2001).
17
