MATULUNG UMAH PUWUN
Sampun kawawa
ring jagate
mapitulung tan tulus
asing tepuk
gampilang
limane patigrape
patisabsab
maalih-alihan
palihate
marengang
kenehe
mangda mapikolih
magarapan
anggen jalaran
tatuweke wantah
ngalih patuas
sujatinnyane
gedenan upah
teken pegae
punika
wantah
sasonggan
gumi
matulung
umahpuun.
(Denpasar, 12-12-2001)
MALEGA-LEGAAN KELOR
Sesama manusa idup
mula tua
saling tulung tinulung
sakewala manut
dudonan tata-krama
Yan mula pisaja
keneh tulus mapitulung
tusing ngarepang pikolih
matulung sasidan-sidan
Gumi linggah ajak liyu
ada demen matulungan
dot mapikolih pangwales
kasub ring desa pakraman.
Ada masih matulung,,
ngerobang anak ring kulawarga
kaupapira kapretenin
raris ipun ngamalingin
Mapwara sang mitulung
tiwas byapara
manut sasonggan
Malega-legaan punyan kelor.
(Denpasar, 12-12-2001)
7
