Makudang-kudang Drama Bali
Tusing madalem barang. Tusing madalem angkihan. Kéweh."
Sari : "Yén Bapa melahan dini, kéto?"
Kobar : "Hé, Tut. Bapa ngidih olas apang olas. Da dot ngoyong di kota. Tulén Ketut ngaé pakéweh. Yén tusing bisa ngikutin modérnisasi cara jani? Ketut nawang artin modérnisasi? Ah, tusing perlu Ketut nawang. Ento raos bakat Bapa baan nuduk. Hé, yén di kota ngajak banjaran iraga madapluk. Gotong royongé suba ipidan ilang. Ngangkuhang idup padidi-padidi. Nyidayang nepeng iriang timpal. Sifat jelé iri atiné maumah di kota. Yén Bapa nu melahan ngoyong di désa. Dini bébas. Nyén bani ngusik?"
Sari : "Bébas? Tusing ada idup bébas, Pa. Musti kaiket aji tetujon. Idup musti kadasarin solah melah."
Kobar : "Ah, né raos bebantahan adané."
Sari : "Dadi kéto?"
Kobar : "Dadi kéto buin? Ah, patakon Ketuté. Sajaan anak belog. Yén Ketut madingehang raos Bapané busan tur ngresepang, tusing perlu buin Ketut matakon, dadi kéto dadi kéto Ketut kuang teleb madingehang raos. Kondisi normal tusing nawang. Modérnisasi tusing nawang. Aduh, kéné muridé jani? Tulén mayah uang sekolah gedé-gedé. Hah, melahan Bapa jemakang yéh. Bapa bedak gati. Tuh gaing rasan kolongan Bapané. (Nuunang kedis, nuutang munyin titiran, jangih). Selegang maangin kedisé, Tut. Né kedis melah."
Sari : (Negak, pliaté sada joh).
Kobar : "Hé, tusing dingeh? Jemakang Bapa yéh. Énggal-énggal. Tusing kodag teken bedaké. Dadi tileh ngemuk?"
Mén Sari :"Né." (Pesu ngaba yéh agelas).
Kobar : "Belog-olog. Nundén panaké, méméné neregeng ngaba yéh. Ngajahin pianak males dogén."
