Makudang-kudang Drama Bali
"Kuuk"
Olih Nyoman Manda
Paos I
(Sada masesek anaké liu negak di pelangkané, ajak papat sedeng madonan. Ada ané negak di sampingané mabalih, ada masi ané negak iteh ngorta. Ada masi ané glalang gliling, ngebah ngandang nganjuh batisné. Di bataran balé banjaré, ada anak sedeng iteh macan-macanan. Sawatara ada suba makiré sanja. Ada dagang kacang tanah teka, nyuun panarak maéngkogan. Anaké ané ada di balé banjaré makejang nyeldét, sibarengan matakon "Ngudiang mara teka?" Dagang kacangé makenyem, patakon ané tusing nyandang sautin. Ada anak ngebug kulkul, bakal manyi mani, di subak Lobongan)
Anak Mokoh : "Bani makisid..., amah tendasné." (Nuding tujuh)
Anak Gelem-Geleman : "Neh, apané kaamah". (Sada ngawałek) (Ane mokoh makelo nengil, makeneh sanget pesan)
"Mai..., dong énggalin makisid."
Anak Mokoh : "Nah!"
Anak Gelem-Geleman : "Maan agem duén."
Anak Mokoh : (Ngisidang batuné)
"Nah...., jani apa bakal orahang. Makisid naké! Sangkala eda naké gedénan gerak. Embet poloné jani."
Anak Gelem-Geleman : "Apané embet."
(Ngawalék sambilanga ngisidang batuné)
Anak Mokoh : "Yih..., nyidaang masi makiba. Nah..., jani né buin cepok."
Anak Gelem-Geleman : "Eda ngulah mamunyi. Jani taanang, mati poloné."
Anak Mokoh : "Apa?"
Anak Gelem-Geleman: "Mati."
Anak Mokoh : "Apané mati?”
Anak Gelem-Geleman: "Nah, makisid naké jani!" (Anak ané negak duur pelangkané nyelag pajujagé betén)
