Makudang-kudang Drama Bali
Luh Nérti : "Nah...Beli...ingetang nyanan lingsiré teka."
Undagan III
(Laut Nérti bengong kalahin tekén Nyoman Sadra. Inguh atiné, tusing karoan jani tindakané dadi engsap tekén gaéna di paon).
Mén Nérti : "Luh..., éngalin naké ka paon!"
Luh Nérti : "Nah Mé..." (Laut nyemak lumburé abana ka paon, suaran cicing ngongkong).
Luh Nérti : "Cék..., cék..., cék….. Nyén ento?”
Mén Nérti : "Nyén ento kongkonga tekén cicingé Luh?"
Luh Nérti : "Cék...cék...cék...Nyén ento?”
(Suara uli diwangan): "Cék...., cék..., céééééééééék."
Luh Nérti : "Nyén ia tumbén dadi galak cicingé ngongkong."
Mén Nérti : "Tingalin ja pesu Luh!"
Luh Nérti : "Nah Mé". (Nyagjag ka pemesuan).
(suara uling diwangan) : "Cek.....cék..., cééééééééék."
Luh Nérti : “Cék..., cék..., eda ngongkong....Yih, Beli Wayan, mai ja mulihan."
Wayan Koyogan : "Cék..., béh galak pesan cicing Luhé. Cék...." (Krejang-krejeng batisné, dangklang-déngkléng).
Luh Nérti : "Sing ja kudianga Beli Wayan. Tumbén pesan Beli Wayan."
Wayan Koyogan : "Ngudiang tumbén, tuni mémén beliné suba mai."
Luh Nérti : "Oh..., saja tuni mémén beliné, singgah ajahan ngorahang ngalih cacah delodné."
Wayan Koyogan : "Mémén beliné sing ngorahang apa.”
Luh Nérti : "Sing ngorahang apa-apa, biasa dogén ja ragané mai singgah. Apa ada urusan miriban Beli saat pesan". Negak ja malu" (Laut Wayan Koyogan negak di plangkané).
