|| Drama Bali Anyar Luh Nérti : "Yén kéné orahang Mé Yan jegég miribang anggon ngempel luu man."
Mén Koyogan : "Béh duegné suba masaut." (Luh Nérti kenyem-kenyem nguntul)
Mén Nérti : “Kénkén Luh... apiné di paon suba ngendih."
Luh Nérti : "Suba tulukin tiang bongkol dadap. Tingalin nah Mé...., tiang bakal ngalih muncuk waluh malu. Tiang ka abian malu Mé Yan." (Laut magedi).
Mén Koyogan : "Béh anteng pesan panakné."
Mén Nérti : "Yén sing ia.....nyen buin bakal nulungin tiang kéné suba tua tur lacuré kliwat."
Mén Koyogan : "Mula dadian yén ngelah pianak luh, bakat ja nang orahin ngudiang, satondéné juanga tekén anaké.'
Mén Nérti : “Mula saja kéto Yan. Nah yén juanga tekén anaké, mula kéto siman idup, sing dadi baan nyebetang."
Mén Koyogan : "Kewehé yan panak luh bajang cara panak emboké... bunga miik... ia mangundang tamulilingan."
Mén Nérti : "Yén suba masané, kénkénang baan ngelidin, kéwala apang beneh duén sulurné."
Mén Koyogan : "Panak tiangé jumah ... jeg ngutang-ngutang duén gaéné. Sing pesan seleg magaé, síng taén ngutang peleng bakal nganggurin anak bajang, cara lubak... lemah anggona peteng, peteng anggona lemah”.
Mén Nérti : "Anak muani mula lén tekén anak luh".
Mén Koyogan :"Bes kéto pesan panak tiangé." (Makesiab inget tekén bakal ngalih cacah)
"Yih.... Ngudiang makelo pesan tiang nutur. Buina ngulgul mbok dini, kondén ka paon. Nah kalahin tiang malu, tiang bakal ngalih cacah."
Mén Nérti : (Ngatehin kanti ka pamesuané) “Yén ada séla, mai-mai ja mlali Yan."
