II Drama Bali Anyar
kema suba Mémé ka paon, tiang bakal ka abian ngémpok muncuk waluh bakal anggon jukut." (Lub Nérti macelep ka paon bakal ngejang gelas bapanné nyemak kranjang padang terus maklieng ka abian. Mén Nérti negak di plangkané nyasadin mua aji anduk cenik. Lantas ada anak luh tua teka
ngaba penarak gedé)
Mén Nérti : "Yih... mén Wayan ...." (Tuun nyagjagin)
"Tumbén semengan pesan né.”
Mén Koyogan : "Dadi suung?”
Mén Nérti : "Bapanné mara pesan ka abian, ngorahang ngaritang sampinné padang."
Mén Koyogan : "Kuda ngubuh sampi?"
Mén Nérti : "Tuah apasang apang ada anggona ngalgal dogén. Negak ja malu Yan. Apa ada alih Wayan, dadi buka tumbén semengan singgah.”
Mén Koyogan : "Sing..., tiang bakal ngalih cacah delodné. Nepukin cengkéhé ngrambiak makita tiang singgah."
Mén Nérti : "Negak ja malu Yan... ené naar basé apa malu”.
(Nyapuhang tikehé tur ngenjuhang pabuan basé)
Mén Koyogan : "Nah..." (Negak di plangkané) "Suba nyakan kénkén."
Mén Nérti : "Mara tiang bakal ngidupang api."
Mén Koyogan :"Béh......lung pesan nyak idup cengkéhé dini. Nged bunganné. Ngancan buin pidan, dadian idupé buin abedik. Tusing cara jani séla duén bakat pupuang."
Mén Narti : "Kéwala dadi Yan. Cengkéh Wayané kadén lung masi, ngrambiak bungané tepukin tiang. Ané di samping badan sampiné nged pesan tepukin tiang."
Mén Koyogan : "Ané di abian tiangé sing nyak kéné ngedné. Miriban nénénan sing ja lemekan sampi duén."
Mén Nérti : "Tepukin tiang anak belianga masi rabuk ané cara
