|| Drama Bali Anyar
Luh Nérti : "Nah nyényé pesan Mémé."
Mén Nérti : "Dija juné?”
Luh Nérti : "Ento...., ditu dangin rompoké. Jeg paling." (Kedék)
Mén Nérti : (Nyemak jun tur nyemak cerik ka kubuné) "Enggalang anaké ka paon, enu masi bengong."
Luh Nérti : "Nah Mé....."(Kedék).
"Mémé naké énggalin ka pangkungé apang sing uyut bapa buin."
Mén Nérti : "Kéné suba... sing ada anggon beneh." (Ngrumuk pedidian sing karoan mabesikan terus makaad).
Luh Nérti : "Ah... kéné suba anaké tua.... Mabalik cara anak cerik. Yén déwéké tua buin pidan kéné miriban....." (Makenyem tur ngantungan ceriké ka taliné di samping rompoké, laut nyemak sampat, ngorékang natah) (kenyem-kenyem, mula siman anak bajang, korék-korék nyampat sambilang magending macekéran sinom)
"Iseng-iseng manungkulang manah, baan bingungé tan sipi, tuara ada anggon nyaruang, sakité di jeroning ati, kebus mluab ka sisi, nrebes yéh matané pesu, pesu ngaé mata barak, barak mamrekang ati, ati ibuk, ibuk ban larané kliwat."
Luh Nérti : "Yéh.... dadi engsap ngadihang api....." (Makesiab laut nuju ka samping pondoké, nuju ka paon gendingé katimpalin suara suling masesinoman). (Buin teka Luh Nérti nutugang nyampat sambilang magending).
Luh Nérti : (Nyampat korék-korék sambilanga magending) "Liwat tuara ada dija, tuara kauh tuara kangin, pragat di ati magenah, sai-sai ngaé paling, paling bas liu rasanin, tong biasa ngingetin patut, ané murka rasaang darma, pangrasané tui mabading, tuara adung, budi laksanané tungkas," (Nanjek inget tekén yéh angeté di paon, magésonan bakal nuju ka paon, laut teka bapané, enu masi
