Makudang-kudang Drama Bali
Luh Nérti : (Makesiab) "Nak ngudiang Bapa uyut semengan?"
Pan Nérti : (Enu masi pedih) "Béh... aéng wiran Nyainé...mandus cara pragusti... lek nyai nyuun jun?”
Mén Nérti : "Né...kénkén panak mara teka dadi pedihang? Biasanné nyén ané kereng kayeh? (Luh Nérti kitak-kituk nepukin mémé-bapané majulat).
Pan Nérti : "Nyai .... munyi duén.....nang énggalang ngaé kopi, icang bakal nengokin sampiné malu" (laut makaad).
Mén Nérti : "Nah... kéto anaké, magaé malu. Eda jeg uyut semengan, lek atiné... yén dingeha teken pisagané."
Mén Nérti : (Cara anak paling, ada ané alih-alihina). "Kéto suba bapan nyainé, jeg uyut semengan."
Luh Nérti : "Apa ané alihin Mémé....dadi lingser keketo. Paling, tuara ada unduka."
Mén Nérti : "Juné dija?”
Luh Nérti : "Ngudiang Mémé kayeh buin, bélongé anak suba bek. Sing ja mémé kanti ngorahin, yén bélongé puyung, yang ja kayeh.
Mén Nérti : "Apang ada dén aba Mémé ka pangkungé. Bapan nyainé jeg uyut duén, kema ja ka paon endihang apiné: seduhang bapan nyainé kopi."
Luh Nérti : "Apa ané uyutang bapa semengan... Mé?”
Mén Nérti : "Aritné apa sing tepukina, bakal ngentungin sampiné padang. Mara sing tepukina jeg uyut. Sajaan anak suba tua, mabalik buin cara anak cerik."
Luh Nérti : "Mémé masi demen nimpalin, yén suba tawang anak bedoos, kanggoang ja nengil."
Mén Nérti : "Bes ngencot ...."
Luh Nérti : "Nah....kema ja Mémé énggal ka pangkungé!"
Mén Nérti : "Ingetang nyen... nyeduhang bapan nyainé kopi.... buin nyen uyut."
