Leak Pemoroan 19
Babak Belur
Ritatkala dina Redité Umanis nemuning purnamasasih kapat, langité galang maglanaran warnané pelung cara baju bénhur. Ketoklakan munyin sepatun jarané macandetan teka uli kelod di Jalan Kartini Wangaya, panumpangné tuah aukud madan I Lentir. Sasubané teked di Kampung Jawa pempatan lantas panumpangé ngenjuhang pipis sambil nundik tundunné pak kusir sakadi wangsit apang marérén dokaré, raris | Lentir tuun kagéson-géson majalan nuut gang cenik nganginang disamping banjaré. Palihatné cara malingé katangehan mréngang nolih kiwa tengen pajalané éncol apang énggal teked sig tongosé ané tujuna.
“Eéh, Pak Wayan Lentir, kok tumbén teka nangkéné?” keto panyambatsarané céwéké gembrot sambilang limané ngedeng I Lentir ajaka macelep ka kamar tongosné madunungan. Lénan tekén céwék ané gembrot, ada masih céwék langsing lanjar, ada ané berag, ada masih ané pawakané sedeng. Liunang bokné mapotong poni siduriné magetep sabates baong, ada ané ma blo ada masih ané makriting, makejang muané matémplok tekén pupur cara anak matapel. Bon parfumné méndahan, ada ané mabo banges, ada masih ané mabo cara cendana, pokokné boné madukan, paling keras ané nganggon binamor boné mompong témbok, yén sing biasa ngadek bon buka kéto makada idéwék uyeng-uyengan. Makejang céwéké totonan kenyéng bin galak sajan nyapatin tamiuné, wiyadinké tamiu ané truna cenik mara puber pertama, kéto masih jawat ané tua suba pawah, cutetné jag pragat laku lamun suba ngaba pipis.
|Lentir mula biasa ngadek bo ané méndahan, sangkala ia tusing bisa lengeh ngadek bonné kakéto, apa buin I Lentir anak mula kasub dana, goroh di pantaran céwéké ané ditu.
Dikénkéné yén ya liu ngaba pipis makejang céwéké traktira belianga bakwan wiyadin mi ayam, ané setata ada
