kénkén baan apang prasidaja énggal sugih, ento awanané ia semengan berangkat magaé, peteng tengah lemengé maraya nawang umah, sinah ia tusing nawang kénkén sasajané suasanané sadina-dina di kubu.
“Kénkén-nto bli, Imbok dadi tusing taén ngenah di kubu suba uling duang minggu, anak ia ngudiang ?” kéto patakoné I Nyoman Getar tekén blinné I Madé Kakul.
“Yén ngudiang jenenga ia jumah, bli tusing nawang.” Kéto pasautné bawak, I Madé Kakul anak mula tuara pati pesu munyi, buka adané cara kakul jag mamolos.Mapan jawabané bawak, bawakan tekén taluh, Nyoman Getar ngadén miribné mbok ipahné ngoopin magaénan di pisaga sangkala tusing taén tepukina jumah. Bin maninné sagétang belinné tusing ngenah di kubu, kanti aminggu I Madé Kakul tusing taén tepukina tekén Nyoman Getar, maratas ia matakon tekén kurenané, anak nguding mbok ipahé tusing taén teka.
“Yan,.., imbok ngudiang tusing taén tepukin waké di kubu, kéto masi I Beli suba aminggu tusing taén ngenah,apa ké Nyai maan masentalan raos utawi majaljal ngajak ia?”
“Sing..., sing taén ada masalah apa ngajak ia.” Keto pasaut luhné I Nyoman Getar bawak. Sawiréh Nyoman Getar mula dot nawang sasajané apa awanané mbok ipahné tekén belinné jag sipeng tusing taén ngenah di kubu? Lantas ia mulih nelokin mbok ipahné. Sasubané ia teked di jumah palekadané tepukina belinne tekén mbok ipahné sedekan negak di ampiké.
“Mbok, anak ngudiang imbok tusing taén teka ka kubu? Keto masi Beli dadi tusing ada ngorangapa sagétang jag ilang uli kubu, ada masalah apa?” kéto patakoné Nyoman Getar tekén nyama kelihané. Kondén | Kakul maan masaut sagetang bapané mamunyi bangras uli metén.
“Depang suba ia dini! Bandingan tekén ditu tusing taén luwung kenehné.” I Nyoman Getar tusing ngelah keneh madingehan pasaut bapané uli di metén, ento lantas ia makaad, sawiréh I Getar anak mula tusing pati demenina
