Leak Pemoroan I tiban ané suba liwat belinné baanga ngidih tanah telung are tekén matuané, sawiréh belinné dugas totonan tusing ngelah apa, kuala I Nyoman Getar dugase totonan suba nepukin merta, mapan ia magaé di hotel. Ento awanané I Nyoman Getar kangen tekén belinné, sawiréh tanahé ané baanga tekén matuané anak tanah paek rawa-rawa endut. Sawiréh tanahé tanah laad penabuan sinah labak glintungan, mapan tongosé totonan laad tongos pemating /petani ngae uyah. Ritatkala yéhé pasang, utawi gede yéh pasthé anak kancab tanahé totonan, sangkala tusing nyidayang nyujukin umah. Mapan I Kakul tusing ngelah pipis lakar anggon ngurug tanahé, ento makada I Nyoman Getar nanjénin nulungin meliang tanah batu putih anggon ngurug apang nyidayang nyujukin umah. Dugas totonan belinné setuju. Kuala mapan dugas totonan Nyoman Getar tusing nyekuk pipis, ditu lantas ia nyilih pipis tekén Anak Agung Aji ané nerwenang hotélé sig tongosne magaé, kuala ngandika Anak Agung Aji.
"Ah ngudiang kéto ban makeneh Man Getar, sing adénan meli tanah padidi nyang satu ara ? Yen bakal ngurug tanah di labaké sinah liu nelasang prabia méh-méh patuh cara ajin tanah duang ara. Kuala yen sasubané maurug tanahé totonan sing kal duriané dadi rebat ?!"
"Sampunang kénten Gung Aji, tiang anak manyama tugelan ten ja kanti tiang marebat ngajak belin tiange!"
"Diapin kéto nyén nawang duriané anak bisa masi kenehé maséh, apabuin subapada ngelah kurenan anak ganjih pesan rebate."
"Sampuniki Anak Agung Aji, tiang anak manyama buka sepité nika, panes dingine pateh nika pada ngrasang!, masak nyan bun titiange las kenehné rebat tekén titiang, padalem titiang ipun nongosin tanah labak ritatkalané sasih ujan-ujan sinah kubun ipuné kancab, kija man ipun rarud ?" kéto aturné I Nyoman Getar. Kuala anaké agung sawiréh mula savang tekén parekane, sing ida bani bas sanget turut campur tekén urusan rumah tanggané I Nyoman Getar.
