Leak Pemoroan | 7
Sagétang tepukina uli gemelan limané Pak Agus ngalébang keris cenik amul tajiné dadua. Ditu lantas Mén Mayun ngorahang tekén kurenané, lantas kurenané ngorahang tekén Kak Badung.
“Nang Lotok, uluk-uluka iraga ténénan tekén Pak Agus?”
“Sawiréh Kiangné matakon tekén tiang, tiang sing dadi bogbog. Anak mula iraga uluk-uluka uling ipidan tekén Pak Agus. Yén ada klenéng maglebug anak uli batis jalérné to pesu. Yén ada pusaka keris ajak akik anak uli gemelan limané lébanga sambilanga nguyeng keris pangradanané.” Kéto Nang Lotok ngorahin man benehné tekén Kak Badung. Kak Badung malengok mapangsegan kipak-kipek sambilanga ngurut-ngurut tangkahné mara mrasa tekén déwékné kapus tekén jelema uli Médan.
“Man, Nang Lotok dadi tusing ngorahang ipidanan tekén icang?”
“Tiang sing bani ngorang kéto Kiangné, sangkala mantun Kiangné orin tiang ngintip apang tusing kadén Kiangné tiang ngaé-ngaé ngorang jelék anak, mapan Kiangné anak tangguh tekén Pak Agus.”
Kak Badung mapineh-pineh sambilanga nguntul.
“Béh, beneh..., barang-barang ané maan ngradana klenéngné makatik geruda patuh sajan cara klenéng ané adepa di peken Bringkiteé.”
Sawatara limolas lemengné sagét morta Pak Agus ngelah belingan di Patal Tohpati. Ané belinganga pasiéné ané kereng terapina baan strum listrik sinah suba terapi luar dalem.
“Sangkala eda bes kadrupon percaya tekén anak ané tuara kenal raket tekén idéwék, apabuin anak beruak- beruak ngaku ririh, Tanbina kadi ikedis guak, anak mula munyiné ngadanin ibané.”
Kéto I Somprét ngrenggeng.
- Ide 26 November selesai 8 Desember 2006.
