6 | | Wayan Sadha
keris mapinda naga taksaka. Béh cutetné sabilang narik barang ané merupa keris lan bajra Pak Agus setata nagih pipis penyataktalian koné lakar anggona meli siap cemara tekén lelipi kobra, ento lakar aliha getihné. Ento koné lakar anggona nebus barang-barangné ané bakat tarika. Béh liu pesan Nang Lotok Cs. nelasang pipis anggona nuukin Pak Agus sabilang penarikan, pipis pamelin oot lan gabahé paling bedik nyang selaé tali, kanti ia ngelah permata padama atoples pejanga di pelangkirané.
Sawatara suba ping dasa narik barang deruwén sunia kasuwén-suweén sawiréh sabilang limolas dina Pak Agus teka ngajakin narik deruwén sunia Nang Lotok ngelah daya, mapan suba lebih tekén limangatus tali rupiah pipisné bakatanga anggona mayah cangkokan bungkung. Saking jengahné Nang Lotok, di temengané Pak Agus lakar narik pusaka sunia Nang Lotok nyaru-nyaru ngidem kuala sambilanga nyeréré, sasubané Pak Agus ngaregepang mantra lantas nguyeng kerisné tur ngitung, satu dua tiga. Dugas totonan Nang Lotok nalektekang uli dija pasajané tekan pusaka suniané, ditu mara ia merasa tekén déwékné uluk-uluka tekén Pak Agus. Dugasné nguyeng kadutané ané anggona narik permata uli gemelan limané maleketik akik wiyadin keris. Yén ia lakar ngeredana bajra, setata ia macelep ke kamar mandi, pesuné adéng-adéng nglantas ngaregepang mantra lantas maketeban sagétang maglebug kelenéng uli batis jalérné ané mapelitan. Ditu lantas Nang Lotok mara merasa tekén déwékné uluk-uluka.
“Béh, kéné dayané Pak Agus, liu pesan suba iraga uluk-uluka.” Kéto Nang Lotok ngrenggeng di tengah kenehné, kuala ia tusing bani ngorahin Kak Badung. Ritatkala wanengné biin lakar narik pusaka sunia Nang Lotok ngorahin mantunné Pekak Badung.
“Luh, Mén Mayun, bin jepan Pak Agus lakar ngredana pusaka sunia awaké mengkebnyan di durin kordén jendélané totonan. Tlektekang Pak Agus uli dija tekan pusakané.” Mén Mayun, mantuné, Kak Badung nyak mengkeb ngintip solahné Pak Agus ngredana pusaka.
