KIDUNG PANJI SUMIRANG, GERIA GDE BALAYU. 72
90b|Tannesuwé dén-yanangis,
angunus dhuwung makaron,
tumanemhane ri jajje,
rudiran-ye mulakken,
pjah Sri Patni kalih,
keng atma nutting Bhupati,
gumuruh tangis kang wong umulat,
Sri Wisnugupta akon,
amasmi Nrepati kallih,
mwah sakweh ing Para-natha. 81.
Radén Narantaka prapti,
Sri Wisnu angucap alon,
"Kaki anak ingsun prapta,
papareng umarekka,
maring sira Sanga Panji,
ngaturana jiwa pati",
Radén Wirantaka angucap,
"Tan miwar sun i pakon,
apti aminta urip,
anut saperenni lampah". 82.
Dyah Nilawati kelaran,
nangis asasambat,
ibu sih i ring sun,
alapen kang jiwa,
suka tumut wasyanti. 83.
91a|Radén Wirantaka ngucap,
"Sampun agung lara,
siphatti Hyang iku,
mangké atur sembah,
ring sing umor ing Widdhi", 84.
Keng laywan wuwus binasmi,
Sri Wisnu angucap alon,
"Anyuten asti Sang Natta",
Keng wong sigra lumarap,
Sri Wisnu angling aris,
pareng marekkakulup kalih,
anut sira Radèn Wirantake,
tur lumampah alon
tan asari lumaris,
katmu si Rangga Wiraddha. 85.
sira angumpul wong ngéki,
Sri Naréndra ngucap alon,
"Duh Déwa Sang kinatwangan,
ngong aminta larapphan",
Merekki Sanga Panji,
"Singgih abechik lumaris",
Sampun prapta ri sor ing wandhire,
sira Panji ngucap alon,
"Alungguhas Nrepati",
Sampun sira sammalungguha. 86.
Angling Sri Wisnu Gupta,
"singgig Sang lwir Smara,
ingsun Ratu Sidayu,
aminta jiwa,
angaturaken putri. 87.
91b/Sira Dyah Anawengulan,
nging ala rupan ira,
wimudda kadurus,
tkeng banwan ingwang,
tumut ri renna renni." 88.
Radén Wirantake angling,
"Ngwang iki tinut akaron,
amintaha jiwitta,
den sing ing inna-sraya,
wirupaha Nilewatti",
Sira Panji angling aris,
"Duh singgih Sri Raja Wisnu Gupta,
mwah yayi sih akaron,
lakun ingsun dhurgati,
rinasha lwir maha-mretthe. 89.
sira Sang putri kalih,
anggrawenna ruditta tinor,
umuletting warnnan nira,
Sang lwir Hyang Manasija,
tan lén usananning branti,
pamurnnanning lara kingking",
Sri Wisnu Gupta mar mara ngucap,
"Ih Nini sira karo,
dé wruh sira ngastuti,
mangké ngong mintar ring wésme. 90.
