Kacrita lingsir sanja suba lantas teka I Tiwas luh muani uli ngalih gae. Nu joh suba asira jukut be siape, wireh basangne suba layah gati. Lantas ngomong, "Beh nyen sih ngae jukut be siap, nyursur bonne nganteg mai. Nyai tusing ngadek?"
"Yeh sajaan ne", keto pasaut Men Tiwase.
"Yeh, toto, nanangne, tingalin ja!", dadi kedas gati natahe laad masampatan, nyen sih olas nyampatang. Yeh ih Pan Tiwase, mai ja delokin, to dadi ada magenep di langgatan paone, nyen ja ngejang? Ye, ih, ne nasi suba lebeng, ento be gerang mabasa blingbing, dengdeng pada ento di klatkate, ento jukut be siap mawadah payuk, beneh ya nyursur bonne ngiruk cunguh. Ye, cirin kenken ya ne, aah Bapanne?"
Masaut Pan Tiwas, "Cirin kenken nyen orabang, jabin cirin basang betek. Nah, jalan te suba amah dogen, nyak ya ngranaang mati, dong suud ya kene kesakitan ngalih amah!".
Ngomong Men Tiwas, "Ah enden te malu awak ngiwasin payuke, sing nyen palinga teken anake ngaenang dedaaran. Mimi aget nu di tongosne, yan ento ilang tekan mati awake sedih". Suba suud keto lantas ia madaar. Beh nyendi-nyendi kone sopan Pan Tiwase baan tumben naar dedaaran jaan-jaan. Sasubanne pada suud madaar, lantas mapaomongan ajaka dadua, ngomongang undukne makejang suba pada ada lebeng matah di umahne. Buin mani semenganne, I Tiwas luh muani tusing luas ngalih gae, nanging ia mengkeb di durin kubunne, wireh ia makeneh nawang anake ane ngaba magenepan ka kubunne.
Kacrita suba dauh telu sawetara, dingeha munyin kene di arep kubunne, "Troktoktok dengkok dengkok dengkok". Lantas I Tiwas pada pesu uli pengkebanne, baane ningeh munyi tawah. Mara teked di arep kubunne, tingalina payuke cenik majalan, bek misi magenepan. Ditu I Tiwas gigian baan kendelne, lantas nyemakin aba-abaan payuke. Payuke lantas buin pejanga di tongosne melahanga pesan. Sawireh jani I Tiwas suba ada ngalihang daar, dadi ia tusing buin ngalih gegaen kema mai, nanging ia nganti dogen jumahne. Sabilang teka payuke mamunyi, "Troktoktok dengkok dengkok dengkok, juangin kumbi!" Lantas juangina aba-abaanne. Payuke buin pejanga. Sayan makelo sayan nyugihang I Tiwas. Panganggo. barang mas, slaka suba liu ia ngelah, uli ngelah payuke cenik ento, katut umah ia suba nyidaang ngae.
Kacrita Pan Tiwas nuju ada jemaka, lantas ia menek ka pa-
94
