Gelising satua majalan lantas ia I Pucung ngamulihang negen
petine. Sasubane neked jumahne, kauk-kauk lantas I Pucung ngauk-
in memenne, "Meme, Meme, ampakin tiang jlanan, tiang ngiring
Ida Raden Galuh mulih. Tiang anak suba icena nunas Ida Raden
Galuh teken Ida Sang Prabu. Matelah-telah men meme ditu jumah-
an icange apang kedas, krana tiang lakar nglinggihang Ida ditu,
uli semengan Ida tonden ngrayunang". Memenne tusing ja ia nawang
keneh panakne, slengagan kone mara ia ningeh pamunyin panakne
buka keto. Dadi ampakina dogen ia jlanan tur I Pucung ngenggal-
ang macelep kumah meten, tur lantas ia ngancing jlanan uli jumah-
an. Petine pejanga kone di pasareane.
Critaang jani suba tengah lemeng tur meme bapanne suba
melah pulesne pada, ditu lantas ia buin ngomong ngrumrum isin
petine, "Inggih Ratu Raden Galuh, matangi Cokor I Dewa, niki
sampun wengi, mriki mangkin Palungguh Cokor I Dewa merem
sareng titiang!" Suud ia ngomong keto, lantas petine ento serega
tur ungkabanga. Mara petine ento ungkabanga, tengkejut pesan I
Pucung dening petine misi macan. Ditu lantas I Pucung sarapa
teken macane. Mati lantas I Pucung.
Buin mani semenganne, dunduna lantas ia teken memenne uli
diwangan, dening suba tengai ia tonden bangun. Kadena panakne
sajaan ngajak Raden Galuh. Kanti ping telu kone memenne makauk-
an, masih sing kone sautina, lantas tinjaka kone jlananne. Ya mara
mampakan jlananne, ya magroeng lantas macane jumahan. Beh apa
kaden tengkejut memenne tur ia buin ngenggalang ngubetang jlanan.
Ditu lantas ia gelur-gelur ngidih tulungan teken pada pisaganne
ditu. Liu pada anake nyagjagin ia tur makejang pada ngaba sikep.
Ditu matianga lantas macane totonan. Sasubane I Macan mati,
mulihan lantas memenne, dapetanga panakne suba mati tur nu
tulang-tulangne dogenan.
- 76 -
