di duur petine mategul. Da pesan iba nyemak serege ne, depin
dogen dini, satonden ibane nganteg di pura. Buin ingetang pabesen
nirane, singa iba makita manjus nyen di jalan pejang petine di duur
pundukane tur seregne depang masih ditu mategul".
"Inggih", keto aturne I Pucung tur lantas ia majalan negen
petine misi Ida Raden Galuh.
Beh magregotan kone ia negen petine ento. Ban kendelne bes
sanget lakar maan kurenan okan Ida Sang Prabu, dadi sing kone
asena baat. Di jalan nepukin lantas ia tukad ditu ia mreren di duur
tukade, dening ia makita manjus. Petine pejanga kone di duur
pundukane tur seregne depina masih ditu. Di makirenne ia tuun
lakar kayeh, matur kone ia teken Raden Galuh, "Ratu Raden Galuh
Cokor I Dewa driki dumun, kenakang kayune driki. Titiang ngaon-
in Cokor I Dewa ajebos, titiang jaga tuunan manjus, dening ongkeb
pesan tan dugi antuk titiang naanang kebuse". Dening Ida Raden
Galuh mwadah peti dadi sing kone pirenga atur I Pucunge.
Suud I Pucung matur keto, tuunan lantas ia ka tukade kayeh
sambilanga mamanting udengne. Tadah ka luanan kone ia kayeh
baan klangenne maan yeh ning. Ditu rauh lantas Ida Raden Mantri
sameton Ida Raden Galuh nandan macan pacang anggen Ida ngen-
tosin sametone. Sasubane Ida Raden Mantri rauh sig tongos petine
ento, ngelisang raris Ida Raden Mantri nyereg petine tur kamedal-
ang arine. Sasubane Ida Raden Galuh medal, jani macane kone
celepang Ida tur buin kakancing, seregne buin kone duur petine
genahang Ida. Ngelisang raris Ida Raden Mantri mlaib sareng Ida
Raden Galuh budal ka Koripan. Buat isin petine kasilurin tusing
kone tawanga teken I Pucung.
Sasubane ia suud kayeh lantas ia menekan. Teked ba duuran
dingeha kone krasak-krosok di tengah petine. Ngomong lantas I
Pucung, "Inggih Ratu Raden Galuh, menggah menawi Cokor I
Dewa dados Cokor I Dewa krasak-krosok wau kaonin titiang manjus.
Margi mangkin Cokor I Dewa budal kumah titiange, drika mangkin
Cokor I Dewa mlinggih sareng titiang. Cokor I Dewa pacang
anggen titiang kurenan. Samalihipun titiang sampun ngadianang
Cokor I Dewa woh-wohan luir ipun; buluan, salak, croring miwah
manggis. Pacang rayunan Palungguh Cokor I Dewa sampun wenten
jumah titiang kagianang antuk panyeroan Palungguh Cokor I Dewa,
tiang maderbe meme. Sampunang te kenten menggah Cokor I Dewa,
mangkin iringa ja Cokor I Dewa budal".
- 75 -
