Kaca:Kembang Rampe Kasusastran Bali Purwa Buku 1.pdf/142

Saking Wikisource
Cebur nuju navigasi Cebur nuju parerehan
Kaca puniki kavalidasi

truna, to kone dedari Supraba lantas petaina teken I Lengar nagih

anggona kurenan.

"Embok-embok kene ja suba, jalan ja suba makurenan ajak

dadua, kene tusing ada anak luh lenan tolih dini", keto abetne I

Lengar. Tusing kone kayun dedari Supraba.

"Lengar, da ja cai keto, cai anak tusing dadi makurenan ajak

embok, cai manusa, embok dedari", keto abet dedarine, masih

lemesina dogen kone teken I Lengar. Bes pepese keto, apa pedih

dedari Supraba.

"Pah Lengar, ne sajaan I Lengar langgia pesan. Beduda nagih

ngungkulin tendas, nah dening bes congah I Lengar teken embok,

wastu bungut I Lengare apang bengor, matanne apang mlontod,

limanne apang sengkok", keto pastun dedari Suprabane, prajanian

lantas I Lengar buka keto. Ngeling kone lantas I Lengar ngidih

pelih teken dedari Supraba.

"Nah jani lingang ibane, kenkenang embok jani cai. Kadung

suba labuh munyin emboke. Nah taanang malu akejep. Yan jani

tusing nyidaang ngilangang malan caine, lamun cai makeneh ma-

kurenan, embok matujuhin cai anak luh, cai tonden ningeh orta,

to panembahan caine di negara Ida Anake Agung kasungsutan.

Okanidane istri palaibang Rangsasa. Asing anak ngalih kema tadaha

dogen teken Rangsasane ento. Wireh suba tusing ada bani panjak-

idane nyeluk okanidane kema, to lantas Ida ngruntuhang wacana,

"Nah nyen ja nyidaang nekaang panak gelahe tur ngamatiang

Rangsasane ento, ento lakar duduk anggon mantu tur lakar ajak

bareng nyengcengang gumine dini, keto saud pangandikanidane.

Kema jani cai. matiang Rangsasane ento, embok marengin

cai. Gaenang embok bui. Ditu di buine embok lakar macelep apang

tusing ada anak nawang. Nah yan suba cai prasida karya, nyidaang

cai ngamatiang I Rangsasa tur ngaturang okan Anake Agung, kala

ento malan caine lakar ilang", keto abetne dedari Supraba, tutut

lantas prejanian ia ngalih buluh anggona bui. Suba jene pragat

buine, macelep lantas dedari Supraba ka buine.

"Nah kadut embok, majalan suba cai jani", keto abetne

dedari Supraba, uli tengah buine. Kaduta lantas buine ento, lantas

ia majalan ka negara.

Tan kacrita di jalan, teked kone suba I Lengar di bancingah.

Mungmung pesan kone bancingahe, tusing ada jlema majlawatan.

Makelo kone baana I Lengar ngepah ditu, mara kone ada parekan


- 139-