Kesusastran Bali Purwa
Kacerita mulihan kone suba I Siap Badeng ajaka pianakne.
"Mai dini ajak di ampike cerik-cerike Men Ceningel, keto abetne Men Kuwuk.
"Nah icang dini dogen ja suba di paon".
"Tawang tuduh ditu, sing pedalem cerik-cerike", keto abetne Men Kuwuk nyaruang dayane, buina apang elahan bane nyaup panakne di subana pules memene.
Kacerita jani suba peteng. Men Kuwuk suba mulihan ajaka panakne ngancing jlanan. Matakon pianakne teken memene,
"Meme, Meme, tamiu uli dija sih ento ajaka liu?"
Masaut memene makisi-kisi:
"Pigisin ngomong Tamiu uli dangin tukad. Ento suba I Siap Badeng ajaka pianakne asepala. Nyanan lamun suba melah pules memene, ajake saup pianakne. Mani tampah tendasne kodag ebuh ngamah be", keto abet memene, ngomong lantas I Kuwuk,
"Meme, nyen icang bang kampidne nah Meme, bakal anggon kepet"!
"Pagigisin ngomong keto ya nyanan dingeha nyen teken I Siap Badeng, sing ya magedi ya".
Buin kone ngomong pianakne ane Nengahan, "nyanan icang bang batisne nah Me, bakal anggon cakar".
Paomongan Men Kuwuke dingeha kone teken I Siap Badeng, lantas memene ngajakin pianakne menek ka punyan teepe.
"Cening, cening, apa jele wangsite, tawang i dewek nagih tampaha teken Men Kuwuk. To munyin pianakne dingeh meme, ada nagih ngidih kampid kone lakar anggona kepet, ada nagih betis anggona cakar. Jalan ja makisid medem, menek laku ka punyan kayune ne. Kemu cening menek malunan. Adeng-adengang men ibane menek apang sing tawanga teken Men Kuwuk".
19
