Kembang Rampe
"Sing apang tawang dogen", keto pasautne I Lutung. Nyanan petengne, kema lantas sig lad I Siap Badenge medem ibi sanja. Dening I Siap Badeng suba tangeh teken dayane I Lutung corah, sing kone ia bani medem ditu, dadi sing tepukina I Siap Badeng teken I Lutung. Ngincang kone lantas I Siap Badeng medem.
Kacerita suba jani pada kebah kampid pianakne sajawining abesik nu kolagan.
Sedek dina anu ba dauh tukad kone I Siap Badeng ngalih amah ajaka pianakne makejang. Suba sanja, laut gulem, lantas pianakne ngajakin memene mulih, "Meme, Meme jalan ja suba mulih suba sanja. Buin kene gulem, lamun nyen tusing blabar di tukade, jalane blabar lantas di tukade, kenkenang nyanan ngeliwat?" "Nden malu cening ne nu selid sa. Nden bin kejepan mulih". Itep kone buin panakne ngalih amah. Pelan suba kritis-kritis ujane tonden masih I Siap Badeng mulih, gede lantas ujane tur blabar yeh tukade. Ditu lantas I Siap Badeng ajaka panakne pati luplup ngalih paembonan. Suba sandikaon teked lantas pada di umahne Men Kuwuk.
"Cening, Cening, jalan ja dini sig umah Men Kuwuke suba nginep lan. Mani dong paekan ja bena ngalih amah".
Nyak kone pianakne ajaka lakar nginap ditu, tur lantas I Siap Badeng kauk-kauk,
"Men Kuwuk, Men Kuwuk".
"Wuh, nyen ento kauk-kauk".
"Icang I Siap Badeng, bang ja icang nyilih dunungan. Kene suba peteng buin ujan lantas, pianak icange ngilgilang sing nyidang apa ngeliwat tukad".
"Nah mai ja mulihan", keto pasautne Men Kuwuk, tur kene kenehne, "jani ta bagia teka. Ganti i dewek aget lakar maan ngamah be siap. Dengdeng ngalih api, nyanan pulesne saup tendas panakne. Kodag ebuh i dewek ngamah be ngajak pianak".
18
