PAOS III
SATUA-SATUA
1. Siap Badeng
Ada tuturan satua I Siap Badeng, ngelah kone pianak asepala cerik-cerik nu kolag-kolagan. Sai-sai ia ngalih amah ka tengah-tengah umahe muah kabet-bete ajaka pianakne. Nuju I Siap Badeng ngalih amah kabete, tepukina lantas teken I Lutung.
"Bih, ne ada siap ngajak panak asepala mai ngalih amah, kenkenang baan madaya apang bakat panakne, apang taen ngamah be siap" Keto kone kenehne I Lutung, lantas paekina I Siap Badeng.
"Teked diae nyai lakar ngalih amah?" Masaut I Siap Badeng.
"Teked dini ba dajanne". Matakon buin I Lutung,
"Nyanan kali kenken nyai lakar mulih?,
"Nyanan sanja".
"Nyanan dija nyai medem?" Masaut I Siap Badeng,
"Ngenken sih tuting pepedeman okene takonang cai? Ija ja petengan ditu oke medem" .
Gelisang satua, kacerita peteng kone suba, ditu lantas I Lutung nyeliksik ngalih-ngalihin I Siap Badeng, nanging sing tepukina. Buin maninne sedekan I Lutung mlali-lali, tepukina lantas tain siap mabrarakan di batan kayune.
"Bih, ne dini ibi sanja I Siap Badeng medem. Nyanan peteng ne mai bakal alih". Bin kejepne bakat papasa kone I Siap Badeng mrerod teken I Lutung, ditu lantas I Lutung buin matakon,
"Siap Badeng, nyanan dija nyai lakar medem?"
"Ngengken sih I Lutung begbeg nakonang okene dogen, cai nagih meneanen panak okene?"
17
