Kesusastran Bali Purwa ajinné duka kalintang-lintang, Radén Mantri makakalih sareng sungsut pikayun, raris ida nyritaang indik duk mara kakutang kanti kayang jani. Mireng indik okanné, sang Prabu nyaup okan idané tur ajak ida ka purian. Ditu lantas Ida Sang Prabu maicaang kagungan idané ring putrané makakalih.
Kacerita jani ida Radén Mantri ring Koripan, nuju peteng ida mlinggih di balé kambangé di taman, tumuli ida mireng raos ngambara, "cening, cening Mantri Koripan jani suba teka karman ceningé, kema jani cening luas ngaba
prau takon-takonang adan muah gobanné, bunga anggon ngupaang matakon. Buina lamun ada anak ngupaang gustinné bunga cempaka, gustin anaké ento suba lakar rabin ceningé, tur cening lakar masalin goba dadi bojog lan madan I Dempuawang. Nanging da cening jejeh Réh magoba bojob! Yén suba rabin ceningé mobot, cening lakar buin magoba manusa." Amonto koné raos ané pirenga tekén ida Mantri Koripan, lantas ida mantuk. Buin maniné Radén Mantri Koripan tangkil tekén ajinné, nguningang raosé ané pireng ida di taman tur ida mapamit lakar ngumbara nglinggihin prau ngrereh karman idané.
Mireng atur okanné buka kéto, sang Prabu lédang tur ngandikain I Punta Jrudeh muah parekan ané lénan ngiring Radén Mantri lan apang ngaba koné bekel lebeng matah.
Gelising satua, Radén Mantri mlayar nuut pasisi. Rauh di pasisin Pajarakané, ida manggihin anak mamancing. Ditu ida matakon "paman, paman désa apa né adané?"
"Niki désa Pajarakan wastané."
"Yén kadi kang sekar napi gustin pamanné?"
"Sekar Bakung, kuduh putih grempiang." Mirengang pamancingé kéto, ida nglanturang mlayar. Rauh ida di pesisin Gegelangé, buin ida matakon tekén anak mamancing,
"paman, paman desa apa né adané?"
"Puniki désa Gegelangé wastané."
"Yén kadi kang sekar, sekar apa gustin pamanné?"
