Kembang Rampé
"Sekar cempaka, sari ilid miik ngalub".
Mara kéto pasaut anaké né katakénin, prajani ida dadi bojog putih tur mungil, ditu lantas iringan idané makejang manglingin Radén Mantri. Radén Mantri lantas mangandika, "Maman Punta Jrudeh, muah panjak gelahé ajak makejang da maman ngeling! Réh jani gantin gustin mamané sadia lakar
maan anak luh jegég. Yadin nira jani magoba bojog, buin pidan yén nira suba makurenan, ditu nira lakar buin dadi jlema, tur lakar tulak mulih ka Koripan. Buina jani kaukin gelah I Dempuawang, adep men gelah dini, lantas kalahin men nira ajak makejang mulih ka Koripan. Yén tondén ada anak meli, da pesan gelah kalahin mulih, dini malu nongos ajak makejang!" Mara kéto pangandikan Radén Mantri, makejang kaulanné suud ngeling.
Kacerita jani Radén Galuh Daa nyumpena matemu mrabi tekén anak bagus gati, nanging anaké eto jani magoba bojog putih, bisa ngomong jlema kaubuh ban wang prau tur lakar bisa koné dadi anak bagus. Ditu lantas Ida Radén
Galuh nangkil tekén ajiné muah rakané makakalih, ngaturin ida mangda numbasang bojog ané ubuha tekén wang prau lakar anggén ida plalian. Miragi pangidih putranné, sang Prabu nagndika, "béh nanak Galuh dadi buka anaké alit, papak raosanga cening, raga suba duur, dadi nagih maplalian kakéto! Déning cening suba duur, keneh ajiné majangkepang cening tekén rakan ceningé Mantri Koripan. Rakan ceningé dini makadadua, panjangkepang aji tekén i cening Galuh Gegelang muah Singasari, dening mula cening mamisan tekén
ento makejang. Yadin kéto pangandikan sang Prabu, Radén Galuh tusing ngiring, masih kedeh tekén pinunasné, apang tumbasang bojog putih ento. Sawiréh tusing dadi ulehang keneh okanné kéto, lantas Ida sang Prabu ngandikain parekan ka pesisi meli bojogé putih tekén wang prauné. Di subané
bojogé ento katur ka puri, angob gati sang Prabu, miwah Radén Mantri makakalih, réh bojogé asih tekén Radén Galuh
