Kembang Rampé
panukub umahné. Sedek ia repot ngalihin ané jemaka, tusing asena teka bakat sampesa payuké, nganti ulung ka patuanganné. Ditu lantas payuké belah sigar mabrarakan, lantas pesu anak cerik luh uli payuké belah ento, sawetara matuuh pitung tiban, jegégé tan kadi-kadi, ngeling mapulisahan di patuanganné, sambilanga masesambatan, “dong, kénkén kadén Bapa Tiwas, saking ganti Bapanné tuara dadi sugih. Mara amonto né Bapa ngelah suba Bapa léngah tekén tiang. Gantin tuah Bapa akejep ngajak tiang dini. Yadin kénkén baan Bapa ngengkebang tiang, suba sinah makelo-kelo liu anaké tau”. Mara kéto munyin anaké cerik ento,
ngénggalang Pan Tiwas macebur uli ba duur laut ngaukin kurenanné. Kurenanné énggalang nyagjagin, sambilanga ngempeng yéh, wiréh ia teka uli nyuang yéh, mara turuanga atenga laut dingeha kurenanné makaukan gelar tur mamunyi makateprug. Nylinap Mén Tiwas matinggalan, kadéna kurenanné kenapa, lantas tingalina anaké cerik ngeling.
“Yéh, ih, ih, Pan, Bapanné, nyén ngelah pianak ajak cai jumahan meten?” “Lantas Pan Tiwas nuturang undukné né mara.” Mara dingeha ban Mén Tiwas tutur kurenanné kéto, entunganga junné, lantas ia ngenggalang nyaup anaké cenik, laut abina. Ditu I Tiwas luh muani nakonin anaké cerik, “dong, jero, jero anak alit, okan sira jeroné, ring dija purin jeroné, dadi jeroné kéné dadi payuk? Indayang tuturin tiang!” Wiréh kedeh I Tiwas, pang kuda-kuda nyumunin matakon, dadi ngomong anaké cenik sambilanga sigsigan, “nah, ah, ah wiréh, éh, éh, suba kéné unduké, kani tiang tuturina, kéwala Bapa, Mémé pada, apang sekep. Yén Bapa lejeh ngorahan tekén anak, tusing buung tiang magedi uli dini. Lamun Bapa Mémé tusing nawang, tiang suba okan prabuné di Daha. Nanging tiang lacur, tiang dadi jelema kakutangan, “ditu Ida Radén Galuh nyatuaang undukné uli panyumu nganti duduka tekén Mén Tiwas. Ida ngandika tan mari nangis, baan éling tekén nrakan ragané. Suud ngandika
100
