Kaca puniki kavalidasi
1.62 GEGURITAN RUSAK SASAK
Puh Sinom
- Sura Amlapura budal, mangojog ka Puyung raris, mapangraos ring punggawa, solah peparane mani, sampun kadauh sami, ne nyandang makapepucuk, ngampidin keri kanan, eneng tan kocap ring wengi, tatas lemah, munyin tambure mangatag.
- Matimbalan twara pegat, pematinge tarik mijil, kalih Sura Amlapura, sampun mlinggih ring joli, maprada bungah ngendih, anut nyanding payung agung, pantes twara kirigan, satekan musuh timpalin, duk katuduh, majalan masesuryakan.
- Pematinge yan sawangang, kadi segara mapalih, magulungan twara pegat, buka gununge magatik, suryake mangambutin, kadi cemara macengung, panedeng di Katiga, grebegan batise kadi, ketug linuh, rasa boya wangde jaya.
- Sura Amlapura ida, egar kayune mangaksi, solah pematinge ngambiar, majalan kadi ring tulis, wenten mangokok titir, mangigel sambil mandrukuh, wenten ngejerang tumbak, manganggar kelewang nengkrik, reh katarka, satrune sayan ngincitang.
- Tan kacrita di jalan, rauhe di Praya gelis, mangiter ia I Bangkol, mangujanin baan mimis, masundul—sundul tarik, munyin mriem kadi kerug, dulurin baan suryak, rasa manguguang langit, nging I Bangkol, ngekong ngelah pasangidan.
- Makelid di basang tukad, ajak rencangnyane sami, atut ada mangadaang, pemating asiki kalih, pemating ring negari, geger ngering sapituduh, kewala buka gebrag, mangujanin baan mimis, keni tileh, sida parapene jemak.
- Musuhe onyangan rusak, ne bani mangamuk mijil, kalih yennya mangarasa, takut mati nunas urip, raos anggen nibanin, dadi kudang dina sampun, twara kasidan kalah, I Bangkol katungkul ngencing, Sura Amlapura, mangkin mamineheng.
190
