Kaca puniki kavalidasi
189
- di tanah langit, maan jalaran, gumine payu kali.
- Kene buktannyane sang ing Pagesangan, sang sumilih ngantianin, palinggih Dewata, I Gusti Nengah Tegahan, ne kajenengang ngagungin, kapi ngarepang, wijiling pramiswari.
- Buka nadak I Gusti tiben panyungkan, raat tur kalunturin, ban Mantra Pangwasa, saktining taranjana, Gusti Mungkrang sida nesti, waluya pisan, Rangda Dirah mamurti.
- Tistis samun sapulineng Pagesangan, niti Satunggil wengi, leake gambura, buka alah sangkepang, patibrengak-patibrengik, saget newata, kang maka sumandihi.
- Wenten pranah nini saking kapurusa, taler wijiling prami, punika kapinta, kapancal kajenengang, jagate atuang subakti, I Gusti Ayuan, Ketut Putu Papasih.
- Suba katur jani ta Amlanegara, Sapinunase sami, Punggawa pramanca, Lulurah Pagesangan, Betara kari minehin, I Gusti Nyoman Karang sareng maosin.
- Sampun puput pangraose kadauhang, tan wenten kadagingin, lwiring rajabrana, minakadi Jajahan, pradesa ngedalem sami, alah pantegang, Gede Sidemen jani.
- Pada sedih inget nganduhungang awak, sapramancane sami, Sang Gede Bonaha, miwah Bagus Intaran, Sang Ketut Bukit nyarengin, matetangisan, kangen tekening Gusti,
- Sang Bonaha nengkik mangenyangsang lima, lantas milingang kumis, munyine mangapak, "Nyamane jalan congah, eda pisan gumarisin, yadyapin, bayah swecan I Gusti.
- Apang tangar baane ngamong kawangsan, pitungane tarinin, mungpung ada ambah, di kalangane jimbar, tongos manyaruang urip, ngetegang jiwa, malarapan baan kali".
- Keto pangraose puputing semaya, sang catur tanda mantri, carem abriukan, mukia Gede Singarsa, ka Mataram manglon-lonin, makakedengan, nyawita ngalih kanti.
