Kaca puniki kavalidasi
144
- ngawe sakit ati, duk i bapane nu idup, muah disubaning pejah, tunasang tirtane ening, ring sang putus, sedananing ban nirmala.
- Di api tong sida mabea, mangun karya ngaben luih, akeh bangga ngonyang brana, becik suksmanyane ambil, gawenang pitrane margi, baan laksanan ragane patut, geseng layone ban solah, satindak lakune ning, den aputus, ane bakti susrusa.
- Kento Adi jua tingkahang, dabdabang mataki-taki, raga alit tuara nawang, dewane jua astiti, aturin canang sai, astawa ri kala dalu, da elad nunas ica, ngarcana Ida Hyang Widi, mangde asung, durus ica panugraha.
- Sampun gemba-gemba mlajah, sekenang telebang jati, mayasa muang matapa, ngulati budine becik, maninggalin ane kingking, momo murkane lan sigug, iri bebekine kutang, darma sadune ulati, den aterus, I Dewa mangyih kasadian.
- Pineh-pineh patelahan, da macara di ati, apa sih ento gawennya, pang da katungkulang sedih, tutur anggen manuturin, apang da sayan tumbuh, loba angkara ring manah, mangulah nene prajani, tuara ngitung, mani puan nyen naanang.
- Malajah Dewa manyurat, giing tegak apang pasti, idep sucine rangsukang, Siwak dadane patitis, agem tangane cepil, tegake da manguntul, amusti tungtunging tingal, suleng cingake ne lancip, semu alus, de ngenyan panakara.
- Sastrane jua pedasang, apang manut pasang suari, kemeri lawan sahita, mangda manut ring arti, guru lagu da ngutangin, da ngulah guru lambuk, kalih mangiket lengkara, pralambang lan kruna linggih, mangde anut, piteges sastra utama.
