Kaca puniki kavalidasi
143
- banda baan Hyang Yama, di Yamaloka katigtig, kabebed katalinin, soring punyan kepuh rangdu, sepa taun lawasnia, wekas malih manumadi, bringkat-bringkut, yug mala matriusan.
- Keto kandannya ting wekas, seken kecap Saraswati, nengaran Putra Sesana, krana beli ngawangsitin, Sang Ayu Adi sami, keni sampun mupang laku, eling beli nering suba, swecan dane bibi aji, nerus tunjung, suciening nirmala.
- Patut takut ring rerama, dreda bakti awot sari, kadi bakti ring Betara, da cauh nganagigis, apin Adi sadia ririh, wicaksana tur kasumbung, meme bapa belog pojol, sigug ngandang tan pakerti, patikacuh, patut masih kasalahang.
- Munyi muug kalalukan, ngopak petane tan pasruti, mamisuh nlatak manemah, ento tong dadi timpalin, kapatut Adi manengil, salah timpalin puniku, meme bapa mraga titah, mangaduh sapati urip, ala ayu, suka duka pangragannya.
- Da ngerob ring rerama, ngangge busana bibi aji, ri kala nyoda rayunan, tangarin bibine Adi, dayanin peese leketik, nrebes ka soda puniku, lan da nampa baan kiwa, ento sami ngawe sisip, keto ayu, atur Beline elingang.
- Makadi mirang da lancang, langsag mabet lakar budi, ane ko drewen i bapa, juang sandang adep sai, anggon mangulurin kapti, mamotoh maniat-miut, dening kenehe angkara, mangulahang legan ati, tuara ngitung, ragane pacang wiroga.
- Yen keto ne laksanaang, dudu tingkah putra jati putra to adannya, pituinya putra bacin, diapin Ping keti taurin, baan sumbah tan kataur, miwah ri tekaning pejah mangun karya ngaben sai, teka ping siu, abenang masih tong pragat.
- Lamun misadia pang prasida, utas utang ring bibi aji, ento taurin baan sumbah, solah lakune ne becik, da
