Kaca puniki kavalidasi
1.45 GEGURITAN DEWA YADNYA RING KARANGASEM
Puh Sinom
- Di Ujung Taman Sukasada, Manujuang kalang kangin, surya bulane makesiar, di muncuk gunung Rinjani, galang ngebekin gumi, samalan jagate lebur, dadi parame suka, wetu idepe mangawi, mangucapang, tingkah karya dewa yadnya.
- Nanging daweg sinampura, i belog maabet ririh, pangkah ngawe gegendingan, kewanten sida manyarik, pilih ada Widi, nyidaang bantas nyak mupuh, manut suara wianjana, mangdi ada anggon pakeling, legan manah, gendang-gending makaronan.
- Teleb inget mangrasang, susrusan jagate bakti, ring Ida Raja Dewata, I Dewagung Gede Jlantik, mula pinuji-nuji, sama dana darma nulus, sangkan kabina-bina, pracihnan jagate bakti, maberiuk, sanggup tulung ngremba karya.
- Buin balikin ucapang, dinane tedun manyuci, Anggara Kliwon Medangsia, tanggal ping limolas wiakti, sasih Sada nemonin, isaka siu ulungatus, nanggu seket sia, ya pageh warsaning bumi, saking susrusa bakti pada mangayah.
- Ida para menak, makadi para sulinggih, sakuum Amlanegara, sagerehan lanang istri, sami tagen mradangin, ngayah ka suci manugur, manggeae sesanganan, sapaniskaraning suci, tuara ngitung, tuyuh sai mapugala.
- Kalih sane maaturan, tebeng pasaling lingganin, pada maliu-liunan, maaturan baas pipis, celeng enyuh muah kambing, pala bungkah kacang taluh, muah kebo kalihdasa, bawi tigang atus wiji, kadi gentuh, aturane maembahan.
- Sane ngawit maaturan, manggala makakekitir, Mawasta I Wayan Tusan, tangkepe tama caliring, nyandang sinabeng puri, dados klian desa Tumbu, rupa bagus dirama, pantes kepala prajurit, yen sawangang, mairip Dipating Tuban.
145
