Kaca puniki kavalidasi
138
- Ni bawang glalak-glukuk, bangun sengi-sengi mangling, tau teken kapisunaang, baan Ni Kesuna cenggih, Ni Bawang mangucap-ucap, bangun nglawan-lawanin.
- Meme bapannya kajujur, makejang galak nigtig, Ni Kesuna nagih nyakcak, Ni Bawang kawelas asih, laut macara ngumbara, magebros laut mamargi.
- Ngalintangin jurang pangkung, napak ring alase pingit, nepukin kedis kepodang, paksi utusaning Kawi, ngicen Ni Bawang berana, pramangkin manadi sugih.
- Wus punika I Cerukcuk, ical reke pramangkin, Ni Bawang gaok ngantenang, tumuli ipun mamargi, mangungsi umali dadongnya, rauhnyane sampun wengi.
- kacrita dadongnya wau, mara mangubetang kori, gelisan rauh Ni Bawang, age laut mangampakin, "Duh cucun dadong I Dewa, maorta I Dewa mati.
- Tigtiga nyai ban ayu, tekan meme bapan nyai, Ni Kesuna kone ninjak, kagiat dadonge ne jani, katunggu baan I Dewa, ento apa bongkos nyai.
- Makaput baan tengkalung, "Ni Bawang ngedengang sami, dadongne bengong ngatonang, busana sarwa mas manik, subeng bebadong lan gelang, belengker bungkung lan pending.
- Masesocan inten jambrut, mirah breliane ngendih, pakedepdep kadi bintang, pakronyoh ulap kaaksi, puputang mangkin nyatuaang, kocapan Ni Bawang mangkin.
- Kajak antuk dadongipun, irika raina wengi, tutug sampun pitung dina, Ni Bawang managih mulih, mangalih meme bapannya, miwah Ni Kesuna canggih.
- Morahan ring daddongipun, sampun reke kajurungin, kadurus Ni Bawang budal, rauh jumahnya kamedin kaping kalih kuman-kuman munyinne nyakitin kuping.
- Ni Bawang sebet kadurus, mulih kumah dadongnya gelis, katuturang saindiknya, dadongnya kawelas asih, miragi tutur cucunnya, dini suba ajak Nini.