Kaca:Kembang Rampe Kasusastraan Bali Purwa Wewidangan I Buku II.pdf/144

Saking Wikisource
Kaca puniki kavalidasi

1.43 GEGURITAN I KESUNA TEKEN I BAWANG

Puh Ginanti

  1. Pirengang sane kacatur, wenten wong alaki rabi, madue pianak dadua, makakalih istri-istri, I Kesuna lan I Bawang, sami sampun pada truni.
  2. Ni Bawang beciking kayun, nanging I Kesuna lengit, nuju memennya ka pasar, bapane luas ka carik, sami pada ngupajiwa, kocap pianaknya kekalih.
  3. Tunden nebuk limang depuk, I Bawang laut mamunyi, "Kesuna jalan idepang", munyinne nuunang padi, "Jemuh tebuk tur dadiang, apang kanti dadi nasi".
  4. I Kesuna mula pengkung, tunda tulud ngaj ak adi, I Bawang ngarap makejang, jantos pragat dadi nasi, I Kesuna gendang-gending di pedeman gulak-gulik.
  5. Sai-sai tunda tulud, I Kesuna liwat cangih, I Bawang sai-sai ngalah, tau teken dewek cerik, I Kesuna liwat daya, ngawe tambet ring pakardi.
  6. Kocap mangkin sampun rauh, saking pasar carik, I Bawang nuju ka tukad, manjus sinambi mamanting, dening wau usan nyakan, awaknyane telah genit.
  7. Gelis I Kesuna masadu, nyaduang adine lengit, tuara ia nyak magarapan, medem bangun gulak-gulik, katuturang sami ala, meme bapane pang sengit.
  8. Pisunane to kagugu, pasadun pianakne manis, kocapan rauh I Bawang, makamben belus mangilgil, wau manyemuhang wasta, nyagnyag bapane manigtig.
  9. I Bawang telah babak belur, macuab-cuab pesu getih, engsap bah tur papetengan, ditu mara karerenin, nigtig panakne Ni Bawang, Ni Kesuna nuding-nuding.
  10. Memennyane ngambil kayu, ngopak tumuli manigtig, sumingkin reko I Bawang, nyeleati rasa mati, Ni Kesuna bareng wirang, maninjak tur manigtig.

137