Kaca puniki kavalidasi
94
- Ngendih manyuluhin jagat, mreren negak daas-diis, duur batune masila, anake odah mamunyi, ne cai apang uning, "Dong kaki manusa tuu, kaki Sang Hyang Guru Dewa, mapinda jelema bengil," Malih ngrangsuk, tumuli masalin warna.
- Trinaya caturbuja, matrisirah tiga aksi, I Wiracita manyumbah, nikel ping tiga mabakti, manguncal sloka sruti, ngastawa Betara Guru, nugran i tuna lampah, tuna guna tuna budi, wiakti kolug, ring tungtung antara bungkali.
- Apan jatining manusa, Sang Hyang Guru ngeling aris, "Ka raningson pinda jadma, teduning loka angaksi, arep waspada uning, punang lampah ala ayu, mangke pwa ya ajenar, mangkin kita sama mulih, pareng ingsun, umantuka maring surga.
- Adalan geganamarga, I Wiracita wotsari, "Tan bisa patik Betara, lumaku adalan langit," Betara angling aris, "Tungganan sun iki dulu, paran katone ika?", I Wiracita angaksi, sekar tunjung, mas siu punang lawa.
- "Lah iki ya gamelana!", I Wiracita wotsari, "Tan bisa patik Betara," biakta serira asalin, neher lumampah Hyang Adi, adalan biomawunawun, I Wiracita ngarad, mesat awor kukus putih, ilang sampun, katon luring surya candra.
- Luhur ana katon ngungang, ring purwa sumungu ngendih, kang swarga ring Siwapada, teja abra galang ening, saptaresi mendakin, amapag Betara rauh, Widiadari-widiadara, saptaswara umung muni, saha grantung, gumuruh saluir gamelan.
- Sampun rauh ring bancingah, alungguh Hyang Dewa Adi, ring padma manik suteja, watek nawasanga nangkil, Dewa Sogataresi, gumelar aweda umung, manguncar sruti sloka, ngastungkara Sanghyang Lewih, sami ngatur, wajik suku wajik tangan.
- Gandaning dupa miik sum irik, apan mangkana purihing, parikrameng Kadewatan, I Wiracita winarni, lengleng bengong tan sipi, apaning tembe andulu, nirbana cintia santa, sriyasa nispraha urip, sing winuwus, socapan uwus hana.
