Kaca:Kembang Rampe Kasusastraan Bali Purwa Wewidangan I Buku II.pdf/100

Saking Wikisource
Kaca puniki kavalidasi

1.30 GEGURITAN BAGUS DIARSA

Puh Sinom

  1. Anake odah mangucap, “Nyanan bau galang kangin, ditu cai majalan, bareng-bareng ajak kaki, mungpung dayuh di margi, apan joh selat gunung, di jalan panes pisan,” tumuli aturu kalih, dauh pitu, inganan bau das lemah.
  2. Galang bulan ngalemahang, anake odah ngentenin, “Bangun cai Wiracarita, jalan ke majalan jani!” I Wiracarita gelis, ngojog ka natahe tuun, negak maarep kaja, manyumbah ring bapa bibi, srusa tuhu, tumuli kalih majalan.
  3. Marerod bareng nganginang, di margane sepi mimit, sawat suba liwat desa, pajalane beneh kangin, carik abian liu entasin, kema wantah ne kajujur, saget wus galang tanah, kedise umung mamunyi, cebceb muug, tadasih anggagana.
  4. Kekere ngatag raina, tuu-tuu suara jangih, bareng teken kete-kete, crukcuke mamunyi nguci, ngraris munggah ka giri, gunung Kelasa-ranipun, margi sripit munggahan, anake odah nerisdis, manyerutcut, majalan twara santulan.
  5. Ngamenekan rejeng pilah, gancang ngeser buka angin, I Wiracita manyempel, leleh mangarad di duri, sambil ngerumun di ati, "Anake odah manyrutcut, ambulan twara bongkang, batis berung makakalih, twara santul, deweke tuyuh mangarad."
  6. Peluh angkihane nunggah, mangangsur ambah ka kuping, mamenekin batu pilah, tajep nyanyap gitgit mingid, gu-nunge tegeh manglangit, sawat duuran ambubu, rasa jro-ning swapena, antaraning pati urip, saget rauh, sampun di tungtung parwata.
  7. Alus melah asih jimbar, makejang ngungang iwasin, surya-ne bumara endag, saru limut manyaputin, sawat ngenah pabalih, tan mari ngawe kayun-kayun, sawang buka nyakra-bawa, Sanghiang Kirana nadarin, abra murub, cayane galang dumilah.

93