tiange ngelah simpenan ubad. Apang enggalan dadi masih alihang dukun lenan," kenten pandikanne Dandak Ketut. Ida mula uning pesan yen penyakit buka kakene tuara dadi ajak maolok-olokan. Yen tunayan siket ane ngubadin bisa ngemasin mati. Sasampune ngawedang Ida mantuk kairing baan Pan Kobar. Ida nganikayang lakar ngutsahayang ubade digelis apang ten enggalan telat katulungan.
Rikala pada bingung ngitungang dija ngalih balian ane pascat nawang indik penyakite, saget teka Loq Sudangsa lan Pak Badrun katehang baan Nengah Sunia lan Wayan Galang. Makejang pada makesyab nepukin Lale Dumilah sungkan, sawireh dugase Wayan Galang lakar majalan raganne dereng matangi. Sujatinne makadadua mula majanji lakar nyinggahin Gusti Ngurah lan Made Sinar. Nika awananne ka Kantor cabang gumanti nyinggahin Gusti Ngurah. Lega pesan kenehne mara nawang Gusti Ngurah sampun nganten ngajak Lale Dumilah lan mangkin di Jeruk Manis. Raganne nagih atehang apang enggal matemu teken pangantene. Gusti Ngurah pesu nyagjagin.
"Pak Badrun, Loq Sudangsa silak negak deriki. Jam kuda majalan uli Sembalun, semengan sampun deriki? Wak, Mek Rempuh, niki Loq Sudangsa pamanne Made Sinar ane tuturang tiang tepuk di Plawangan ipidan," kenten Gusti Ngurah nyapa tamiune. Pan Kobar lan kurenanne masih enggal nyalamin Loq Sudangsa lantas saling gelut.
"Ampurayang Made Sinar nggih Loq. Tiang angayu bagia, ngucap syukur yen I Luh mangkin kari ngelah rerama ane nyak ngakuin kulawarga, apang ten pegat silsilah leluhurne yadiapin ia mangkin dadi pianak tiang." Wayan Rempuh nyuksemayang.
"Nggih Bapak sareng Ibu Wayan deriki gumanti sane olas nuduk nyaman tiange sengsara lara, satmaka nyadangin jatma labuh, ngidupang jadma sane sampun padem mangdane sida maurip. Tiang
75
