saha bareng nyurung ka pasirepane di bale daja. Saisin umahe mangkin pada gerun nyagjagin. Gusti Ngurah Darsana natabin malihin kedutan bayu lan angkihanne makejang melah, banban. Nanging paliatne joh sawat cara ada ane naut. Mirib kasambet cara Luh Purnama dugase di Ampenan ipidan. Enggal raganne ngambil dupa tatelu saha enjitanga, lantas masila ngacep Sang Hyang Parama Wisesa dumadak Ida ngicen panugrahan apang rabine selamet eling maka jati mula. Salanturne dupane kanggen ngasepin uli rambut kateben nganti ka jerijin batisne Paningalanne mabileh nrudu sendu lantas maduuhan.
"Ooh, kenapa tiang niki Tu Ngurah? Nguda kene lemet gati bayun tiange. Tiang ningeh ada anak ngaukin adan tiange uli rurunge diwangan. Batis tiange nyeh alah bitbit makita malaib, nanging ten nyidayang," kenten Lale Dumilah mara nyidaang mamunyi. Ajine, Ibune, Pan Kobar, lan Wayan Rempuh tumben bingung nepukin sakite buka kene. Napi malih Gusti Ngurah Darsana dereng uning rarincikan sorohan penyekit cara di Sasak. Nika awananne dane lantas nunden Pan Kobar matur teken Dandak Ketut Patrem di Karang Siluman. Tuara ngomong napi buin Pan Kobar age nyemak montor maseret nuur Dandak Ketut Patrem. Ajahan ida sampun rauh iringa teken Pan Kobar terus nyingak Lale Dumilah. Makelo ida ngaksi, natabin sirah, tangkah nganti ka batisne ane tuara nyidang maklisikan. Lale Dumilah nyaritayang napi ane karasayang uli pangawit nganti mageblug di tengah natahe engsap teken raganne.
"Beh, niki penyakit pagaen Sasak, nganggo alat ane acepa uli joh. Nanging bisa masih pasangina jumah deriki. Yen di Bali kadanin kena hantu sawireh kaater nganggon adnyana sandi. Nah tiang amung maang panawar dogen malu anggon nambakin apang penyakite ten nyusup ka ragane ane lenan. Tiang ngalih sarana malu. Dumadak kantenan
74
