kayun liu nginem apang ten nganti punyah. Jam solas peteng mara truna-trunane budal. Pangantene masih sampun lesu, lantas enggal macelep ka kamarne. Nanging teked di kamar raganne masih dereng nyidaang sirep. Kari masih ngalanturang nutur kangin kauh, tundak-tundik ,saling sigit, arah-aruh magulungan buka ombake tan maren-maren ngusapin bibih pasihe mamutih madidih-didih. Petenge sayan sepi. Sreongan katake ngongkek satmaka angkihan gumi.
Kasuen-suen sang kalih nyeriep engsek lelep sirepne. Ngedas lemah angine ngasirsir ngampehang bon bungan arum dalune miik ngalup. Gusti Ngurah makesyab matangi sawireh Lale Dumilah ngadebas bangun kapupungan saha ngeling sigsigan. Alon-alon ia nuturang ipianne. Panganggonne borbora teken paman ajaka misanne Raden Nuna.
"Tu Ngurah, napi artin ipian tianga niki. Tiang takut miribang mamiq sajaan mabudi morbor lan ngusir tiang uli jumah. Masa beli Wiradana tusing nyidang ngolas-olasang nunasang pangampura,"kenten Lale Dumilah nutur, rasa kambang paliatne.
"Nah, eda ento selselanga. Ipian nuut bayu, kadung bakat kenehang raos pamane ibi. Miribang teked jumah saja ibukanga teken mamiq ajak inaq. Nyen nawang raganne teka satonden iraga majalan mulih ka Bali." Rabinne alon-alon nupdupang, ngusuh-usuhin Lale Dumilah kasih-asih nganti buin lelep sirepne.
Maninne tumben jam pitu mara pada matangi. Gusti Ngurah nundun rabine. Sang kalih lantas pesu tuun ka natahe. Nanging tan pararapan Lale Dumilah saget labuh manyelempoh di natahe. Batisne karasa lemet tan pabayu. Gusti Ngurah ngenggalang nyangkol rabine, nanging lemet tan nyidaang negak, ngaraos napi buin majujuk. Paningalanne nelik cara ada ane takutina. Pan Kobar enggal nyagjagin
73
