ngajeng." Gusti Ngurah ngajakin rabinne ka kamar. Di mejane dapetanga ada piring tuah abesik, nanging nasi lan darang nasine sampun magenepan. Ada jukut olah, rawon lan sate kambing, pesan karper, jeroan magoreng lan krupuk udang. Woh-wohan jeruk, apel, salak, biu mawadah piring.
"Beh sing lenan teken Luh Purnama ane ngelah gaene tenenan. Mabuaka maang piring makan abesik apang iraga satata magibung," kenten Gusti Ngurah ngeremon. Lale Dumilah milu kedek, lantas masoda dadi apiring magibung saling sopin. Pamuputne Luh Purnama ngintip uli sisi mapi-mapi ngaba lap makan. Mara sedeng iteha ngantene saling sopin magibung Luh Purnama jag macelep tan pawangsit.
"Beh, niki lap makane kecag. Ampurayang nggih ngaduk-aduk anak magibung. Naaah kenten mara kanggo. Denda Milah perlu majengin Tu Ngurah kapah-kapah. Masa raganne dogen nagih sopin." Keto Luh Purnama lantas makiles lakar pesu.
"Nah, endahang suba timpale. Kaling jani suba nganten, tiang tusing takut intip Luh Purnama. Sakewala keto, buin pidan terima karma palane.Lakar ada ane masilihin."
"Araah, nyen nawang. Mancan tiang nganten miribang ragane sampun teked di Irian, ngonyang tanggu kangine," kenten Luh Purnama kedek ingkel-ingkel lantas pesu.
Petenge nika timpal-timpalne arombongan ane milu ka Rinjani makejang teka. Magenepan kadone. Made Artha ane paling paeka umahne simalu teka ngabaang ayam taliwang. Ane lenan ngaba jaja roti kering, bolu, kue basah, muah inum-inuman anggon mapestaan.
Made Sinar, Luh Purnama, lan Wayan Galang amung mesuang piring, gelas anggon wadah jaja lan minumane. Makejang mangkin pada liang kenehne mapestaan anggon ngaramenin pangantene. Gusti Ngurah ten
