sanget angayubagia. Ten sida antuk tiang mayah yadin urip tiange aturang tiang ring Ibu. Mangkin wenten Made Sinar anggen tiang keponakan, sat maka mustika anggen mon-mon nyupat dewek tiange. Agung dosan tiange kaliwat ring misan tiange Asmarinah tan sida purna yen tan polih pangampura saking Made Sinar. Samian niki mula saking pituduh dane Gusti Ngurah Darsana sane nutdut manah kalih ngupak matan tiange mangdane eling ring padewekan, uning sane madan iwang patut," kenten pandulamenne Loq Sudangsa sambilanga ngeling ngalih-alihin keponakanne. Kangen pesan ia mabudi enggal matemu ngajak keponakanne.
"Nggih Loq Sudangsa, makejang sampun tuturang tiang teken Memek lan Wak Pan Kobar. Made Sinar kari masuk. Miribang buin jebos ia mulih sawireh dina Jumat," kenten Gusti Ngurah nyautin. Pak Badrun kemeng sawireh Lale Dumilah tuara ngenah.
"Gusti Ngurah, sedeng becik tiang meriki ngirim kesuna sareng Sudangsa raris simpang ka kantor, wau uningin yen Gusti Ngurah jaga pindah tur mangkin kocap sedek nganten sareng Lale Dumilah. Nggih dong nikain medal rabine pang polih nyelametin."
"Beh, tiang lega pesan Pak Badrun ajak Loq Sudangsa teka meriki nelokin tiang. Nanging lacur kurenan tiange sakit ten nyidang bangun. Ten kena baan ngorang kenken sakitne sawireh nadak pesan tuni semengan jag repuk mategtog deriki di natahe."
"Ooh, napi sampun rerehang dokter, napi balian. Manawi wenten jatma ne jail."
"Sampun, mara pesan baliane mantuk. Ida ngandikaang mula pagaen jadma ane ten lega nepukin tiang nganten ajak Lale Dumilah.
Ida masih ngandikaang apang tiang ngalih balian Sasak ane nawangan indik penyakite niki." Gusti Ngurah nerangang.
76
