"Nggih jero tamiu ngiring durusang munggahan melinggih. Ampurayang genahe kosekan tur momos sapuniki," kenten Gusti Ngurah Gede. Tamiune malinggih di tikehe pada masila ngampok marep-arepan. Pan Kobar lan Kliange negak di sampingne Gusti Ngurah Gede. Wayan Rempuh lan panak-panakne masih sayaga lakar ngayah saperlune.
"Inggih Pak Kliang, sakadi ature sane ibi niki tiang ngatehang Lalu Wiradana, sareng paman lan sametonne lianan meriki gumanti pacang netesang ngetut indik pamargin rainne merangkat meriki. Tiang nunas Pak kliang sareng panglingsir deriki mangda ngamedalang Lale Dumilah mangda polih matemu, mabaos sadu arep sareng paman lan beliqne ngawakilin reramanne meriki," kenten kepala kampunge ngawitin.
"Inggih, boya kasep. Mangkin rarisang nyedah utawi ngalanjar dumun. Puniki uningang tiang wantah Ibu sareng ajinne Gusti Ngurah sane wenten ring Tanjung, niki Bapa Wayan Serimben sane madue pondoke puniki." Kliange milu ngenalang. Wayan Rempuh ngawangsitin panakne apang ngaba kopine pesu ka bale daja acukupan. Gipih Luh Purnama lan Made Sinar nyodaang tamiune wedang lan jaja mara lebeng. Gusti Biang Suci ngetok kori ngawangsitin oka lan mantune apang pesu. Alon Gusti Ngurah mukak kori pesu katututin baan Lale Dumilah lantas malinggih paek ibunne tan mari makenyem manggutan ngormatin tamiunne. Lalu Wiradana makenyem ningalin adinne, nanging misan lan pamanne masebeng jengah, masih nungkasang apang ngenah cengah. Anggon ngilangang kabilbilne Raden Nuna lantas ngaroko klepus-klepus.
"Ngiring Mamiq, Lalu sareng sami durusang wedange mangda nenten gelisan dingin. Ampurayang amung toya kewanten katur." Aris Pan Kobar ngembakang sepine.
67
