sampun makering takut suryakina ring kedis cerukcuke," kenten Gusti Ngurah kenyem nyarere rabinne.
Lale Dumilah kimud kabilbil sawireh lelep nganti madundun mara nyidayang bangun.
"Denda Milah kenken. Nyak melah sirepe?"
"Titiang ten uning Bu, napi pules, napi ngipi, napi kenken?" "Elinge cunguh tiange pecika ring Tu Ngurah, kocap sampun lemah. Tiang amung nutug Tu Ngurah ngantos ka kamar mandi. Bu, Tu Ngurah nakal. Tiang pandusina, ambuhina, sorsora antuk toya dingin ngantos ngilgilang." Lale Dumilah masadu tan mari nyigit tangan rabinne.
"Nah, ento mula ane beneh apang bayun ceninge buin matuptup tunasang teken Batara Wisnu. Yen cara maluan malah masiram di pabinan baan yeh kumkuman."
"Inggih usan ngadeg derika. Ngiring meriki sarengin Ibu lan Ajine ngawedang. Niki adeng lan madune ajengang," kenten Wayan Rempuh saha nyodaang wedange di bale daja. Lale Dumilah ngalendotin tangan rabinne. Batisne saja gepu, ngetor, nanging saru ketab-ketebanga sawireh saja semutan. Ngantene sareng aji lan ibunne mangkin pada ngawedang. Mawanti-wanti ibunne matuinget mantune yen nyanan rikala ngarepin panegtege apang inget teken janjine ngajak Gusti Ngurah. Eda kanti ngawe jengah. Wayan Rempuh lan Gusti Biang Suci dinane nika repot ngae jaja anggon nyapa tamiune ane lakar teka. Banjare ane majati masih sampun korahin apang sayaga nganti jumahne.
Jam dua rombongan panegtege uli Sengkol sampun teka, luire Lalu Wiradana, paman lan misanne Raden Nuna, katehang pak kepala kampung, polisi dadua lan sopir. Pan Kobar lan kliang banjare nyapa tamiune lantas kapesilak malinggih di bale daja. Gusti Ngurah Gede lan rabinne saking aris nyilahang tamiune malinggih.
