"Inggih, inggih ... rauh tiange dados ngarepotin," kenten Lalu Wiradana saha nyiup kopine kabarengin baan tamiune lenan. Gusti Biang Suci nyodorang jajane karep tamiune. Sasampune maan macanegan ngawedang tamiune lantas buin ngalanturang.
"Inggih Gusti Aji kalih sameton sareng sami santukan niki sampun siang ngiring ja lanturang babaosane. Inggih rarisang Mamiq pinaka pangelingsir maritetes okane dening sampun angkep sareng sami," kenten pamahbah uli kepala kampunge.
"Nggih rarisang Mamiq, tiang sareng sami mula gumanti nyantos. Napi sane jaga nikayang, takenang indik kaiwangan pianak tiange sareng Lale Dumilah tan papamit purun mamargi sasiliban," kenten Gusti Ngurah Gede nampenin raos tamiune.
"Inggih, nyambung babaose sane ibi, rauh tiange meriki gumanti maritetes, natasang daging surat pianak tiange sane sampun katerima antuk reramanne. Nah Denda, apa saja Denda majalan madasar saking tresna nutug Gusti Ngurah Darsana? Reraman ceninge blangsah mamulisah kalahin cening budal tan papamit. Bas maranne cening
matuturan ngasih-asih ngorahang lakar meragatang kuliahe. Apa buin ene belin ceninge kone suba majanji lakar nelokin cening kayang Minggune ngajak inaq ceninge. Tong madaya saja Maman ajak makejang cening lakar ngalahin buka jani. Tegarang pinehin apang melah, apa cening tusing lakar nyelsel di kaduriane tusing nepukin meme bapane mati? Teges raos ceninge ento ane idih Maman ajak beline mai, apang bisa Maman maang kaputusan indik pajalan ceninga Tolih beline, Paman ajak misane mai sawireh mamiq Ian inaq ceninge tusing nyidayang mesuang raos kapining Denda. Ene ada suratne katiba teken cening," kenten raos pamanne pinaka wakil saha nyerahang surate teken Lale Dumilah ane nampi sambilanga magisian di tanganne Gusti Ngurah Darsana. Ane
