elek magenti di ajengne Gusti Ngurah. Akuda baana nungkasang, nanging limanne ngetor mara lakar ngeregang resluiting bajunne. Gusti Ngurah amung kenyem maekin. Rabinne sayan runtag nanging masih nungkasang nyemak tanganne Gusti Ngurah apang malinggih di sampingne.
"Tu Ngurah, ampurayang tiang kari bingung, jejeh madukan dadi abesik. Tiang awang-awangan inget teken kadadiane ipidan dasdasan prekosana teken misan tiange. Ingete manyama tiang tumben milu mulih magandeng ngajak raganne. Tong madaya dugase singgah jumah timpalne di Selong minuman tiange isinina ubad tidur. Nanging dugas tiange lakar prekosana pules tiange kari sekeda sepera. Kari nyidang makaukan nunas tulung pesu uli kamare. Di margane tiang nyetop montor buin mabading ka Cakra. Nika awananne tiang pindah mondok deriki sareng Gek Sri. Yadiapin kasep, tiang marasa madosa yen ten nyaritayang niki ring Tu Ngurah. Tiang satata takut tur sangsaya teken anak muani ane mapi-mapi sadu sujatinne buas cara buaya. Mangkin kanggena ke Tu Ngurah, napi kari percaya ring dewek tiange kari suci, utawi nganggep tiang sisan cicing borosan, silak. Tiang sukserah ring Tu Ngurah mangkin," kenten LaleDumilah ngeling sigsigan makakeb di pabinanne Gusti Ngurah Darsana. Alon lan saking rasa welas asih Gusti Ngurah mangunang rabinne lantas abina. Yeh panonne usap-usapina.
"Denda sayang, suud ngeling. Sing ada pakewuh, gagaen muah persoalan ane pragat baan eling. Tiang percaya teken Denda. Ento awananne tiang nyerahang awak lan nresnain ragan Dendane buka jani. Eda buin sumanangsaya, buktiang apa ane orahang tiang dugase di jembatan pelabuhane di Ampenan. Keto masih mani puan teked di Bali eda nyen denda ilik,pedih yen pradene ada ngaku utawi ngorahang tiang ngelah gagalan. Tiang mula taen ngalah gagelan, nanging lacur
