Gipih Luh Purnama lan Made Sinar ngaba ajeng-ajengan lan piringe ka bale daja. Makejang mangkin pakremos ngajengang. Gusti Ngurah lan Lale Dumilah sodaanga piring abesik lan wajik tangan.
"Nggih Jro Mekel rarisang mangkin ngajengang, ayahin rabine ambilang encen sane senengin. Ngawit mangkin ten dados ka paon, bale dangin, sajaba ka kamar mandi. Banggayang Made Sinar lan Luh Purnama sane ngayahin," kenten Wayan Rempuh.
Aji lan ibunne kalintang ledang kayunne nyingakin mantune saling sopin ajak okanne. Jam dasa mara pada suud madaar wiadin ngajengang lantas matetamped. Petenge sayan sepi. Gerungan montore di margane masih sayan langah. Luh Purnama atehanga teken Wayan Galang kadununganne Made Sinar masih nginepin Luh Purnama apang ada ajaka ngorta. Pan Kobar ajak kurenanne masare di kamarne Made Sinar. Gusti Ngurah Gede lan rabinne merem di kamar okanne. Pengantene mangkin merem di bale daja ane kanggon kamar penganten. Makejang sampun kaatur rapi. Kasur, galeng, lan sepraine magenti anyar makejang. Meja ane di arepan jendelane sampun mataplak biru marenda, maias ban pot bunga anggrek bulan putih bresih telung carang. Di sampingne ada kotak kosmetik lan miik-miikan. Kenten masih isin lemarine kagenti baan panganggenne Gusti Ngurah lan Lale Dumilah ane perlu-perlu dogen. Ane ngatur tuara len tuah Made Sinar ajaka Luh Purnama.
Sasampune macelep ka kamar lan ngancing kuri, Gusti Ngurah masalin nganggo piama biru nguda. Lale Dumilah kari bengong negak di tanggun dipane. Bayunne runtag ningalin Gusti Ngurah mesuang daster tipis krem mabunga barak nguda uli lemarine.
"Denda, ene anggon masalinan," kenten Gusti Ngurah saha ngenjuhang dastere.
Lale Dumilah nyemakin dastere, nanging bayunne sayan jejeh,
61
